Los 770 númberos de ‘Les Noticies’ van dixitalizase pa la so consulta

Cúmplense 25 años de la presentación na Feria Internacional de Muestres d’Asturies (FIDMA), en Xixón, del númberu 0 del selmanariu ‘Les Noticies’. L’históricu periódicu n’asturianu dafechu, que s’espublizó hasta febreru del 2012, va dixitalizase na so totalidá pa facilitar la so consulta llueu d’una donación fecha por Inaciu Iglesias.

L’editor y primer direutor del mediu aconceyó esta mañana con Antón García, direutor xeneral de Política Llingüística, con motivu d’esta efeméride. L’alcuentru sirvió pa que’l Gobiernu recibiere los 770 exemplares espublizaos nos 16 años de vida de la cabecera, confirmándose’l compromisu de la dixitalización de la totalidá d’ellos pa que cualquier ciudadanu pueda consultar les miles d’informaciones, reportaxes y artículos d’opinión firmaos nesti tiempu.

El primer númberu de ‘Les Noticies’ saldría a los quioscos el 6 de setiembre del 1996, un mes depués de la presentación del 0. Dende entós, tolos vienres foi fiel a la so cita colos llectores, llegando a tener una tirada d’hasta 5.000 exemplares.

La crisis del 2008 supunxo un duru revés pa la rentabilidá del periódicu. El so últimu númberu salió a la cai 3 de febreru del 2012, calteniendo la edición dixital unos meses más.

Na semeya, García y Iglesias con dalgunos de los exemplares de 'Les Noticies'.