La Biblioteca d’Asturies dispón de los 770 númberos del selmanariu 'Les Noticies' dixitalizaos

|
Alberto Suárez, Juan Miguel Menéndez Llana, Antón García y Inaciu Iglesias dixitalización 'Les Notic

Cuasi un añu depúes, los 770 númberos de ‘Les Noticies’ que’l so editor y primer direutor Inaciu Iglesias entregó a la Conseyería de Cultura, Política Llingüística y Turismu yá tán dixitalizaos y disponibles pa la so consulta na Biblioteca d’Asturies. Les copies van llegar a otres entidaes.

Foi’l 17 d’agostu cuando Antón García, direutor xeneral de Política Llingüística, recibió tola coleición en papel coincidiendo colos 25 años de la presentación na Feria Internacional de Muestres d’Asturies (FIDMA) del númberu 0 de la histórica cabecera en llingua asturiana. El compromisu de l’Alministración yera dixitalizalos pa que tuvieren a disposición de tou interesáu, dalgo que yá ye realidá.

Juan Miguel Menéndez Llana, direutor de la uvieína Biblioteca d’Asturies ‘Ramón Pérez de Ayala’, foi’l receptor esta mañana de los fondos dixitalizaos. Van contar tamién con una copia la biblioteca de la Universidá d'Uviéu, l'Academia de la Llingua Asturiana, el Real Instituto de Estudios Asturianos (RIDEA) y l'Archivu Históricu d'Asturies.

En total dixitalizáronse más de 20.000 páxines, la totalidá de los 770 númberos del selmanariu espublizáu dende’l 1996 al 2012, que llegó a tener una tirada d’hasta 5.000 exemplares. El primer ‘Les Noticies’ saldría a los quioscos el 6 de setiembre del 1996, un mes depués de la presentación del 0, y dende entós tolos vienres foi fiel a la so cita colos llectores hasta’l 3 de febreru del 2012, cuando dexó d’editase en papel.

Na semeya, Alberto Suárez, que fora xerente de Publicaciones Ámbitu, editora de 'Les Noticies'; Menéndez Llana; García; y Iglesias na Biblioteca d'Asturies col dispositu que guarda los exemplares dixitalizaos.

Contador Estadistiques