Les esposiciones de Cuadonga 2022 abren con una amuesa n’Uviéu sobre la buelga bibliográfica de la batalla

|
Inauguración esposición ‘Covadonga, una batalla historiográfica’

Obres lliteraries de diferentes xéneros, dende’l sieglu XVIII hasta anguaño, componen ‘Covadonga: una batalla historiográfica’, la primera de les seis esposiciones previstes na programación de Cuadonga 2022, que conmemora los 1.300 años de la batalla. Va poder visitase hasta’l 11 de setiembre na Biblioteca d’Asturies pa depués viaxar a Xixón.

Comisariada por Juan Miguel Menéndez y César García de Castro céntrase na contienda militar del sieglo VIII. Asina, l’amuesta trata de separtar el componente turísticu, natural o devocional que acompaña a Cuadonga pa poner el focu sobre los fechos históricos que foron l’orixe de tou.

El visitante va ver pieces destacaes de la producción lliteraria y científica sobre la propia batalla de Cuadonga o sobre les sos repercusiones como fitu relevante de la nuesa historia. Novela, teatru, cuentos infantiles o cómics que reinterpretaron el fechu históricu al traviés de la ficción, per un llau, y crónicas anteriores al sieglu XX o l’alderique a partir del enfoque institucionalista de Sánchez Albornoz nos años 60 y les corrientes con cimientos antropolóxicos y sociales que tomaron fuercia nes universidaes nos 80, pel otru, van atopase nella.

‘Covadonga: una batalla historiográfica’ va poder visitase na Biblioteca d’Asturies ‘Ramón Pérez de Ayala’ hasta’l 11 de setiembre n’horariu 8.30 a 20.45, de llunes a vienres; de 10 a 13.50 y de 16 a 20.45 los sábados; y de 10 a 13.50 los domingos y festivos. Llueu va instalase na xixonesa Biblioteca Pública Xovellanos ente’l 21 de setiembre y el 6 de payares.

Na semeya, María Antonia Pedregal, direutora del Muséu Arqueolóxicu d'Asturies; Ramón Rodríguez, direutor del RIDEA; Pilar García Cuetos, vicerrectora d'Estensión Universitaria; Aníbal Vázquez, alcalde de Mieres; Pablo León, direutor xeneral de Cultura y Patrimoniu; García de Castro, coordinador de l'amuesa; Concepción Paredes, direutora del Archivu Históricu d'Asturias; y Juan Miguel Menéndez Llana, direutor de la Biblioteca d'Asturies, na inauguración de la esposición.

Contador Estadistiques