El Camín de los Santuarios, ruta nueva ente Llébana y Uviéu pa conmemorar los 1.300 años de la batalla de Cuadonga

|
Pablo León, Berta Piñán y César García de Castro Camín de los Santuarios

La programación de Cuadonga 2022 cuenta con seis grandes esposiciones, conciertos, alcuentros científicos, conferencies, cursos o xornaes formatives. Va inagurase tamién el Camín de los Santuarios, una ruta ente Llébana y Uviéu pa conmemorar los 1.300 años de la batalla de Cuadonga, de 200 quilómetros de llargor.

“L’apertura del Camín de los Santuarios representa un aliciente cultural y turísticu nuevu pa tola zona y una de les exes vertebradores de la programación del aniversariu”, rescampló Berta Piñán. La conseyera de Cultura, Política Llingüística y Turismu apuntó que nestos momentos tán executándose los trabayos d’acondicionamientu y d’ameyoramientu de la señalética a lo llargo de la ruta.

Nos meses siguiente tamién van entamase actividaes nos conceyos que la crucien. Éstos son El Valle Altu de Peñamellera, El Valle Baju de Peñamellera, Cabrales, Onís, Cangues d’Onís, Parres, Piloña, Nava, Noreña, Siero y Uviéu.

“Queremos ufrir al públicu asturianu y a los que nos visiten una visión rigurosa de lo que supunxo’l fechu histórico y la repercusión enorme que tuvo a lo llargo de los sieglos. Y fadrémoslo al traviés d’una programación ambiciosa y multidisciplinar”, esplicó Piñán. El vienres va inauguráse na Biblioteca d’Asturies la primer esposición prevista, ‘Covadonga: una batalla historiográfica’, mesma xornada na que va entamase na Sala Capitular del Real Sitio de Covadonga la segunda conferencia del ciclu ‘El Camín de los Santuarios’ del Real Instituto de Estudios Asturianos (RIDEA), entitulada ‘Sonidos en la altura. El paisaje musical de Covadonga’, que va correr a cargu de María Sanhuesa a partir de les 19.30 hores.

Amás, tamién se presentó la primera de les espublizaciones especiales de Cuadonga 2022, les actes del Congreso Internacional d’Historia ‘El Reino de Asturias en el contexto europeo de los siglos VIII y IX’, celebráu nel 2018, nel que participaron especialistes de dientro y fuera d’Asturies.

Na semeya, Pablo León, direutor xeneral de Cultura y Patrimoniu; Piñán; y César García de Castro, coordinador de la primer espublización de Cuadonga 2022.

AdxuntuTamañu
Microsoft Office document icon Programa Cuadonga 202279 KB
Contador Estadistiques