L’asturianu y el mirandés, presentes nun congresu de la polaca Uniwersytet Warszawski

L’Instytut Studiów Iberyjskich i Iberoamerykańskich de la Uniwersytet Warszawski entama esti llunes y martes el cuartu congresu internacional ‘Redefiniendo los márxenes dende una Península pluricultural’. El mirandés y l’asturianu van tar presentes de la mano de Duarte Martins y Michał Belina, y Inaciu Galán, de manera respeutiva.

Esti departamentu de la universidá de la capital polaca dedícalu esti añu a ‘Ucroníes, utopíes, distopíes. Pasaos alternativos presentes paralelos, futuros imaxinarios’. Ana Garrido preside’l comité organizador, que mira al asturlleonés cola participación del periodista y escritor xixonés y la collaboración de l’Associaçon de la Lhéngua i Cultura Mirandesa.

Galán va tomar parte mañana de manera telemática, na sesión prevista a les 13.15 hores moderada pol Belina, cola intervención ‘‘Depués d’ochobre’ y ‘La colomina 36’, ucronía na lliteratura asturiana última’, centrada nestes dos obres de Nicolás Bardio. En concreto, va falar d’elles “como exemplu del tipu de lliteratura tratáu nesti congresu esistente dientro del actual bayurosu panorama de la lliteratura escrita n’asturianu”.

Pela so parte, la variente del asturlleonés falada en Portugal tuvo presente esta mañana na sesión plenaria dedicada a la ciencia-ficción cola comunicación de Martins, del Agrupamento de Escolas de Miranda do Douro, ‘Utopias no ensino do mirandês’. Yá mañana, xornada final d’esti congresu de matrícula de baldre, Belina, de la Uniwersytet Warszawski, va falar na sesión de les 11.20 hores, de la ‘Adquisiçon de la lhéngua mirandesa pulas pessonas luso-falantes’.

Na semeya, llar de Instytut Studiów Iberyjskich i Iberoamerykańskich en Varsovia.