L’ALLA va presentar el Diccionariu Etimolóxicu de la Llingua Asturiana al rector Villaverde

|
Ignacio Villaverde

El presidente de l’Academia de la Llingua Asturiana (ALLA), Xosé Antón González Riaño, y Xosé Lluis García Arias y Ana María Cano van celebrar una entrevista a cuatro col rector de la Universidá d’Uviéu centráu nel Diccionariu Etimolóxicu de la Llingua Asturiana, proyeutu nel que collaboraron entrambes organizaciones. Va ser nel marcu d'una visita institucional d'Ignacio Villaverde al llar social de l'ALLA.

González Riaño va recibir al rector nuevu mañana al meudía. Llueu de los saludos protocolarios, va presenta-y les llinies de trabayu científicu y el resultáu de les principales investigaciones desendolcaes o en desarrollu, delles en collaboración cola propia universidá.

Frutu de les bones rellaciones de dambes instituciones ye’l Diccionariu Etimolóxicu de la Llingua Asturiana, que recién completó los conteníos lexicográficos cola espublización del sestu tomu, pendiente agora del sétimu, ‘Diccionariu de la Llingua Asturiana. Apéndiz. Índices y Bibliografía’, que se va asoleyar esti mesmu añu. Villaverde va poder conocer la importancia d’esti proyeutu nuna entrevista a la que se van sumar l’autor, García Arias, y Cano.

La ex presidenta de l’ALLA y caderalga emérita va tresllada-y el valor científicu de la obra, mentes que’l primer dirixente de la institución, que tamién fora caderalgu de la Universidá d'Uviéu, va presentar la mesma. “L’apaición del sestu tomu d’esta obra magna pon el ramu a un periodu de collaboración, especialmente intensu y granible, ente l’Academia y la Universidá”, rescampla la institución.

Na semeya, Villaverde frente a la Escuela Superior de Marina Civil, en Xixón.

Contador Estadistiques