El sestu tomu del Diccionariu Etimolóxicu de la Llingua Asturiana completa los conteníos lexicográficos

El Diccionariu Etimolóxicu de la Llingua Asturiana (DELLA) va tar disponible na so totalidá nos meses próximos. Llueu de la espublización de los tomos númberu cuatro, cinco y seis , completando asina los conteníos lexicográficos, yá ta en preparación el séptimu y últimu.

Esti importante preséu, del que ye responsable Xosé Lluis García Arias, ye una de les obres científiques cimeres al rodiu de la nuesa llingua, a la que da prestixu filolóxicu. Editáu pola Academia de la Llingua Asturiana y la Universidá d'Uviéu,inclúi cada pallabra rexistrada nel Diccionariu de la Llingua Asturiana (DALLA), el so orixe etilomóxicu y documentación de testos nes qu’apaez per ocasión primera.

El primer tomu (A-B) asoleyóse nel 2017, anque se presentó de forma pública en marzu del 2018, añu nel que tamién saldría d’imprenta’l II (C-D). Nel 2019 espublizábase’l III (E-F), dexando pa esti 2021 el IV (G-Ñ), V (O-R) y VI (S-Z).

Agora ta trabáyándose nel séptimu, el que completa’l DELLA, ‘Diccionariu de la Llingua Asturiana. Apéndiz. Índices y Bibliografía’, que ta previstu que vaya a imprenta esti mesmu añu.