L'ALLA recupera la prueba de conocencia

|
Llar de l'Academia de la Llingua Asturiana (ALLA)

Dos años y cuatro meses depués torna a convocar esti esame pal sábadu. La matrícula va siguir abierta hasta'l miércoles.

L'Academia de la Llingua Asturiana (ALLA) recupera esti 2022 la prueba de conocencia, que se celebra nuna convocatoria única a diferencia de les dos añales que venía poniendo hasta'l 2019, xineru y mayu, y que se vio cortada nel 2020 pola pandemia, yá que namái s'entamó la primera d'elles. Una iniciativa que desendolca "sabiendo'l fondu interés de munches persones de llograr que se reconoza la so conocencia de la llingua y manifestar asina'l so fondu amor al idioma asturianu".

Va ser el sábadu, a les 10.30 hores, nel llar social de la institución, n'Uviéu, cuando se va desendolcar esta prueba que cuenta con dos partes. La primera va principiar con un dictáu, pa continuar con una torna, una serie d’exercicios gramaticales y una redaición.

Darréu, l’aspirante a algamar el títulu de conocencia pasará a otra sala u caltendrá una conversación breve con dalguna persona del xuráu que valorará’l so dominiu oral del idioma. A les persones declaraes aptes, l’ALLA dará-yos un documentu onde s’afite la conocencia nel nivel 1 o básicu según los calces siguíos por esta institución que-yos permitirá entrar direutamente nel cursu de nivel avanzáu de la Universidá Asturiana de Branu (UABRA).

P'aprobar han d’amosar un dominiu tanto de les normes llingüístiques como de la situación actual del idioma y del procesu de normalización nel que ta inxertu. El plazu de matrícula, con un costu de 20 euros, va tar abiertu hasta'l miércoles y pue tramitase al traviés d'esti formulariu.

 

Contador Estadistiques