La plaza de la Catedral d’Uviéu axuntó cientos de corazones nún llatiendo pola oficialidá

“Queremos una oficialidá ensin más retrasos, y tamién ensin recortes, y ensin apellíos, como manda la Constitución”, espresó la XDLA’l sábadu na concentración d’Uviéu na que los asistentes fixeron un mosaicu formando una ‘O’ na plaza la Catedral con banderes. El coleutivu pretende convertir el diseñu de les mesmes, con un corazón de colores, en “una insinia de dignidá” que pueble estos meses toda Asturies.

Dende tiempu enantes de les 12, hora marcada pa la concentración pola oficialidá del asturianu y gallego-asturiano con motivu del XLII Día de les Lletres Asturianes, celebrada la xornada anterior, los más de 400 inscritos pa participar nella diben averándose al llugar establecíu, faciendo una filera pa recoyer la bandera que la Xunta pola Defensa de la Llingua Asturiana (XDLA) vieno amosando en dellos requexos del país en díes previos per redes sociales. Un corazón de colores, con fondu blancu o marrón, qu’acompaña la pallabra ‘Oficialidá’.

Nun toos pudieron entrar na plaza, dau’l plan densendolcáu polos militantes del coleutivu pa cumplir col distanciamientu social que marca la situación epidemiolóxica actual, quedando munchos nel esterior del espaciu llendáu xunto con otros munchos manifestantes que s’averaron al llugar y nun fixeren el trámite solicitáu d’apuntase. En total, más de mediu millar de persones que glayaron al empar pola oficialidá usando tanto l’asturianu como’l gallego-asturiano mentes que los más madrugadores llevantaben la bandera formando un mosaicu nel que rescamplaba una ‘O’ de ‘Oficialidá’.

Aplausos, allegría y optimismu nun momentu nel que paez que la mayoría parllamentaria esistente na Xunta Xeneral podría permitir la reforma del Estatutu d’Autonomía pa incluyila, pa lo que se necesiten trés quintos de la Cámara, esto ye, 27 diputaos. Ente PSOE, Podemos y Asturies pela Izquierda (IX-IAS), los que yá se posicionaron a favor, sumen 26, siendo necesario un votu más que podría venir de Foro, formación en procesu de refundación pa centrar el so proyeutu n’Asturies que yá anunciara un procesu d’alderique internu sobre la cuestión llingüística.

Trés xeneraciones

Llueu de la realización del mosaicu con banderes, María Xosé Martínez, presidenta de la XDLA, “lleó un discursu nel qu’apuntó que detrás d’estos corazones de colores que lleven llatiendo 40 años hai trés xeneraciones d’asturianes y asturianos”. Una ye “a la que-y tenemos qu’agradecer que nunca se dieren, que llograren, en condiciones bien peores que les d’agora, facer llegar hasta nós la llingua que compartimos y que por esa llucha, por esi trunfu, merecen una reparación y un reconocimientu”, siguió.

Otra xeneración ye la que “namás quier poder vivir n’asturianu con dignidá, ver reconocíos los sos derechos y poder mostrar con arguyu la pertenencia a una comunidá llingüística”, mentes que la tercera fórmenla los que necesiten “tener futuru pa garrar con ilusión el testigu de l’ayalga cultural que suponen les dos llingües propies d’Asturies y asumir con puxu la responsabilidá de conservales pa otres xeneraciones que van venir. “Y too eso, la reparación, la dignidá, el futuru pal asturianu y pal gallego-asturianu, namás va ser posible con oficialidá”, aseguró Martínez.

La XDLA celebra que se vaya poner en marcha por fin el procesu p’abrir la reforma del Estatutu, pero nun comparte los plazos afitaos pol presidente Adrián Barbón venceyaos al control de la pandemia. “Nun ye serio”, aseguró la cabezalera d’esti coleutivu cívicu.

“Ye urxente abrir el procesu de reforma estaturaria, pero tamién ye urxente zarralu. Nun queremos más comisiones d’estudiu nin más maniobres dilatories qu’aplacen y aplacen y aplacen”, señaló darréu Martínez. “La reforma del estatutu pa declarar la oficialidá yá se tenía qu’entamar en sabiendo qu’había una discriminación, una falta de derechos d’una parte de la población d’Asturies. Nun ye ético saber d’esa inxusticia y nun poner tolos medios que se tienen, tol poder, tola maquinaria llexislativa a furrular p’acabar con ello”, añadió.

“Queremos una oficialidá ensin más retrasos, y tamién ensin recortes, y ensin apellíos, como manda la Constitución, como tienen n’otres comunidaes autónomes con una llingua propia diferente del castellanu: Galicia, País Vascu, Navarra, Cataluña, Valencia y Baleares”, rescampló Martínez, que pidió a los partíos “que dexen de llau les estratexes partidaries y qu’encaren co laltor qu’amerita la responsabilidá histórica que tienen. Nun hai sides, nun hai nada qu’esperar. Ye posible facelo yá, nesti periodu de sesiones”.

Un símbolu de la reivindicación

La importancia que va garrar les banderes de la XDLA, que regaló a los primeros n’apuntase a la concentración y que tien a la venta a un preciu de 5 euros, dexóla cayer Martínez nel parte final del discursu, al que siguió una actuación de pandereteres. “Vamos garrar eses banderes que tenéis nes manes y llevales per toa Asturies como una insinia de dignidá hasta que nun veamos reconocíos los nuestros derechos”, señaló.

Xosé Candel encargárase enantes del actu d’atender a los munchos medios desplazaos a cubrir la concentración y tamién calcaba nuna campaña que nun se reduz namái al mosaicu del sábadu. “Tenémosla entovía por definir, pero inspírase un poco naquella de ‘Doi la cara pola oficialidá’”, apuntó, cola intención de que se vía la demanda d’oficialidá “d’estremu a estremu, d’este a oeste y de norte a sur”.

El representante de la XDLA tamién apuntó que “nun nos gusta muncho la definición d’amabilidá” al respeuto de la oficialidá de Barbón, “porque con quién quier ser amable, ¿colos que piensen recortar derechos?”. Tampoco-y presta al coleutivu “que se fale agora de modelu. Nosotros l’únicu modelu qu’aceptamos ye’l modelu dignu como’l que tienen les otres comunidaes con llingua propia. Y si nesi modelu se piensa establecer un techu pal desarrollu posterior de la Llei de Normalización, tampoco lo vamos almitir”.