Selmana de les Lletres Asturianes

La Mesa de la Cámara decide que les supuestes duldes se resuelvan al final de cada intervención

|
Marcelino Marcos Xunta Xeneral

La FSA y IX acordaron na Mesa de la Cámara, cola oposición del PP y l’astención de Ciudadanos, que nel casu de qu’un diputáu diga nun entender una intervención n’asturianu sía’l presidente que decida en cada momentu. Habríen de facelo al final y indicar cuáles son pa que, si se considera, l’otru parllamentariu les esclarie darréu.

Llueu de la falta d’alcuerdu na Xunta de Voceros sobre l’actuación nel supuestu de qu’un diputáu asturianu diga nun entender l’asturianu, tres retirar la Federación Socialista Asturiana (FSA-PSOE) la so criticada propuesta d’autotraducción, quedó la decisión en manes de la Mesa, qu’esta mañana aldericó sobre’l proceder. Finalmente aprobóse, colos votos del presidente Marcelino Marcos y la vicepresidenta primera María Celia Fernández (FSA), y el preste del secretariu primeru Ovidio Zapico (IX), estudiar casu por casu y que’l presidente de la Xunta Xeneral o de la comisión decida.

El proceder si se diera’l casu de que nun s’entendiera una interveción n’asturianu y gallego-asturiano ye’l siguiente: el parllamentariu nun podrá ser interrumpíu y namái al final la persona que supuestamente nun lu entendiera deberá comunicalo y esponer les sos duldes. Será’l momentu nel que’l presidente, si lo viera conveniente pal bon desarrollu del alderique, podría decidir que les esclariara en castellanu.

El vicepresidente primeru de la Mesa, Pablo Álvarez-Pire, votó contra esta midida, que tampoco se llibra de les crítiques, mentes que’l secretariu segundu Luis Armando Fernández Bartolomé (Ciudadanos) astúvose. Podemos, fuera de la Mesa, sigue oponiéndose a les soluciones aportaes a “un problema artificial” que crea la ultraderecha.

“Tamos fondamente procupaos pol escenariu políticu que se ta abriendo na Xunta Xeneral, na que per primer vez na historia se ta impiendo l’usu de les llingües propies d’Asturies”, afirmó’l diputáu Rafael Palacios. “Esto tien un solo oxetivu, que ye desanimar l’usu del asturianu y del gallego-asturiano y xenerar un conflictu que nun esiste porque nun esiste nengún problema de comprensión”, añadió.

Na semeya, el presidente de la Xunta Xeneral, Marcelino Marcos, intervién de pie nel Plenu institucional pol últimu día d'Asturies.

Contador Estadistiques