La cayida de contaxos sigue: 12 diarios de media la selmana pasada

|
Puntu de vacunación Universidá d'Uviéu nel Campoamor

Esti domingu, con 5, rexistróse la cantidá más baxa dende'l 27 de xunetu del añu pasáu.

Les cifres de la pandemia n'Asturies siguen en cayida. Na selmana pasada comunicáronse 82 positivos, pasando de 70.669 confirmaos –una revisión de datos aumentó el total en 1– a 70.751, lo que significa una media de 12 casos diarios polos 20 de la selmana anterior.

Ye la cantidá más pequeña dende que n'Asturies.com venimos rexistrando esti datu, a lo último d'agostu del añu pasáu. La evolución dende entós ye la siguiente: 39, 46, 52, 83, 92, 92, 150, 210, 272, 334, 408, 508, 344, 252, 194, 125, 101, 78, 101, 167, 292, 421, 482, 383, 226, 154, 135, 144, 113, 113, 119, 115, 121, 126, 115, 84, 52, 49, 53, 51, 50, 55, 51, 57, 196, 448, 493, 423, 289, 194, 133, 77, 60, 42 y 20, hasta los 12 actuales.

La Conseyería de Salú, a falta de la espublización de los datos oficiales, informó de 30 contaxos esta fin de selmana: 16 el vienres, 9 el sábadu y 5 ayeri. Trátase tamién de la cantidá más baxa dende'l branu pasáu, en concreto dende'l 27 de xunetu, xornada cuando se rexistraron 2 positivos.

La tasa de positividá a 7 díes ye del 1,13 por cientu, lo que supón una mengua con respeuto la rexistrada'l xueves, que yera del 1,51 por cientu.

Un fináu

Estos díes hebo que llamentar la muerte, el sábadu, d'un home de 88 años. Ye la númberu 2.066 del andanciu.

22 persones tán hospitalizaos en planta con confirmación o sospecha de COVID-19, 10 menos que'l xueves. A ellos hai que sumar los pacientes ingresaos na UCI, con una cifra que se caltién en 11.

Na semeya, puntu de vacunación móvil ensin cita previa instaláu'l vienres nel Campoamor na primer xornada destinada a trabayadores y estudiantes de la Universidá d'Uviéu. 1.530 persones pasaron pelos distintos repartíos per toa Asturies nel segundu 'VACFriday'.

 

Contador Estadistiques