El preámbulu de los estatutos de Foro propón pa les llingües d’Asturies un marcu llegal que cumpla cola Constitución

|
Carmen Moriyón congresu refundacional de Foro

Foro aprobó esti sábadu nel so IV Congreso Extraordinario de Foro Asturias, celebráu de manera telemática baxo’l lema ‘Refundarse para centrarnos en Asturias’, los sos estatutos nuevos. El preámbulu del testu propón pa “la llingua asturiana y la fala un marcu llegal que cumpla colo dispuestu nel artículu 3 de la Constitución y nes disposiciones europees respeuto a los derechos llingüísticos”.

L’artículu 3 de la Constitución, nel so puntu 2, afita que “les demás llingües españoles serán tamién oficiales nes respeutives Comunidaes Autónomes d’alcuerdu colos sos Estatutos”. “Foro Asturias considera la llingua asturiana y la fala como llingües propies d’Asturies, y propón pa elles un marcu llegal que cumpla colo dispuestu nel artículu 3 de la Constitución y nes disposiciones europees respeuto a los derechos llingüístico, y garantice’l so usu ensin nenguna torga nin imposición pa les que nun les conozan”, señala’l testu aprobáu’l sábadu por 244 compromisarios, mentes que 16 refugáronlu y 61 astuviéronse.

Ésti ye ún de los munchos aspeutos que toca l’entamu de los estatutos d’una organización que pasa a definise como “un partíu políticu asturianu, autonomista, democráticu, reformista y lliberal que tien como oxetivu la defensa, proteición y impulsu de los intereses políticos, económicos, sociales y culturales del Principáu d’Asturies y de los sos ciudadanos”. Carmen Moriyón, presidenta, encargóse güei, na segunda edición del informativu ‘Asturias Hoy’ de RPA, de recordar “que’l congresu de Foro nun se fixo p’apoyar la cooficialidá nin cuestiones de la cooficialidá” y que será cuando’l proyeutu de reforma del Estatutu d’Autonomía anunciáu por Adrián Barbón “tea enriba la mesa” cuando’l so partíu, yá “col DNI anováu p’aldericar sobre esi aspeutu”, verá “qué tenemos que dicir pol bien d’Asturies”.

Darréu aseguró que’l votu 27, “que dende fuera de Foro s’atreven a dicir que yá ta fechu”, nun ta decidíu y va depender de la negociación d’una reforma que va ser más amplia. “Nós como partíu siempre defendimos Asturies, los asuntos d’Asturies como ye la so llingua, cola non obligatoriedá y la non imposición, pero eso ye una manifestación de calter xeneral. Cuando llegue’l momentu y haya otres cuestiones qu’han d’aldericase, yá veremos cuála ye la opinión de Foro y ónde ta Foro”, afirmó.

Na semeya, Moriyón intervién nel uvieín Espacio Circus, onde dellos dirixentes y compromisarios acudieron con aforu reducíu pa participar nel congresu telemáticu.

Contador Estadistiques