El paru baxa en 3.496 persones n’agostu

|
El paru baxa en 3.496 persones n’agostu

El númberu de cotizantes nuevos suma 373.232, la cantidá más alta dende agostu del 2019.

El desempléu caltién l’enclín menguante n’Asturies. Los datos de paru rexistráu d’agostu constaten una baxada nueva de 3.496 persones, lo qu’asitia’l númberu de demandantes d’empléu en 61.669, el meyor datu dende payares del 2008. Ye’l sestu mes siguíu d’amenorgamientu interanual.

Según los datos espublizaos güei pol Ministeriu de Trabayu y Economía Social, el descensu algama’l 5,36 % al respective de xunetu, cuasi’l doble que la media nacional, que s’asitió nel 2,42 %. Asturies algamó la tercer mayor cayida de les comunidaes autónomes, namás per detrás de Baleares y Canarias.

Si se garren como referencia les cifres d’agostu del 2020, el descensu xube al 20,22 %, con 15.629 paraos menos que va un añu. Ye la mayor cayida de tola serie histórica y el segundu mayor descensu del país, que la so media ta nel 12,33 %.

El desempléu amenorgó en tolos sectores d’actividá, en dambos sexos y en tolos grupos d’edá, sobre manera ente menores de 25 años, con una cayida de 12,37 %. En comparanza con agostu del 2020, el paru nesti colectivu baxó’l 34,56 %. Los mozos son ún de los grupos prioritarios de les polítiques actives d’empléu que desenvuelve’l Gobiernu d’Asturies p’ameyorar l’inxertamientu llaboral.

Contador Estadistiques