Asturies rexistra'l mayor aumentu del paru

|
Seronda

El fin de la campaña de branu fai medrar el desemplegu en setiembre en 2.539 persones, pa poner el total en 64.208. Sicasí, ésta ye la cifra más baxa pa esti mes dende'l 2008.

Asturies ye l'autonomía onde más creció'l paru esti mes, un 4,12 por cientu, finando con seis de baxaes, dende marzu. En concreto namái aumentó en cinco territorios más: Cantabria (2,26 por cientu), Melilla (1,68), Illes Balears (1,41), Galicia (1,18) y Andalucía (0,55).

A nivel estatal baxó en 76.113 persones, un 2,28 por cientu de descensu, que dexa'l total de demandantes d'emplegu en 3.257.802. Les meyores cifres tienles Canarias (8,84 por cientu), siguida de La Rioja (8,78) y Ceuta (8,40).

El sector onde aumentó más el paru foi'l servicios, un 85,70 por cientu, coincidiendo col fin de la campaña turística. Asina, los conceyos más afeutaos son los que concentren les visites nesta época del añu, como Cabrales (28,07 por cientu), Cangues d'Onís (26,57) o Llanes (24,80).

Por contra, la construcción y la industria caltuvieron los niveles de emplegu. Magar el crecimientu del paru esti mes, la contratación caltién la tendencia positiva de los meses últimos, con un incrementu del 8,76 por cientu hasta sumar 28.638 colocaciones.

No que respeuta a afiliaciones a la Seguridá Social, pierde 6.709, lo que supón una mengua del 1,8 por cientu.

Baxada interañal

En comparanza col añu pasáu, hai un descensu interañal del paru del 17,69 por cientu, con 13.798 desemplegaos menos. Ye una baxada superior a la media estatal, del 13,73 por cientu, un total de 518.683 persones.

Illes Balears, con un 36,09 por cientu, lidera la llista, siguida de Murcia (20,98 por cientu) y Catalunya (20,86). Les cifres más baxes son les de Cantabria (2,76), Comunidad de Madrid (3,06) y la Comunitat Valenciana (3,31).

Contador Estadistiques