El derbi pon en xuegu más de 3 puntos

Una victoria permitiría al Sporting metese de manera definitiva na llucha polos puestos de promoción y al Uviéu salir del descensu.

Con 8 partíos per detrás, el derbi asturianu llega nun momentu clave de la temporada pa los dos equipos punteros del fútbol asturianu. Los roxiblancos tornaron tres el parón de cuasi trés meses nun bon estáu de forma y motivación, sumando un empate en Riazor y un trunfu en Santo Domingo, mentes que los azules enllazaron dos empates como llocales, nun periodu nel que'l factor campu yá nun ye tan influyente pola ausencia de públicu, que compliquen la so situación clasificatoria depués de les dos victories col Tenerife y l'Extremadura UD enantes del estáu d'alarma.

Ganar esta nueche n'El Molinón (21.45 hores, GOL) supón pa dambos, amás de los 3 puntos, un reblagu de cara a afrontar el tramu final de la temporada. El Sporting colocaríase octavu, a un puntu del sestu clasificáu, el Girona, que suma 49, mentes qu'al Uviéu permitiría-y sacar la cabeza de los puestos de peligru, siendo l'empate un frenazu a les aspiraciones actuales de los dos conxuntos.

Djukic sigue ensin contar pa esti choque con Aitor García, Bogdan y Damián Pérez, a los que sumó recién Hernán Santana, con Pedro Díaz como dulda por unes molesties y Javi Fuego baxa por sanción. Mentes, Ziganda afronta una xornada más ensin la pieza clave del equipo, Saúl Berjón, amás de Nieto y Coris.

Na imaxe, ambiente d'El Molinón nel derbi de la temporada pasada. Nesta ocasión, la crisis sanitaria pola pandemia de COVID-19 obliga a xugalu ensin públicu.