El derbi asturianu podría xugase ensin públicu

Les dos xornaes próximes de Primera y Segunda van celebrase a puerta vacía, cola posibilidá d'ampliales a otres dos más. Tol deporte ta afeutáu por esta midida.

Depués d'un derbi descafeináu pola ausencia de desplazamientu de l'afición visitante na ida a mou de protesta pol protocolu de seguridá, sacante unos pocos aficionaos sueltos que s'asitiaron pela so cuenta nel sector visitante del Tartiere, el panorama na vuelta podría ser entá peor pa la gran fiesta del fútbol asturianu. Nesta ocasión el Sporting-Uviéu podría xugase ensin públicu de manera preventiva pola espansión del coronavirus COVID-19, una midida que les autoridaes tomen pa frenar la mesma y que nun se reduz namái al fútbol profesional, yá que'l Conseyu Superior de Deportes (CSD) amplíalo a tolos eventos deportivos.

De momento LaLiga yá confirmó que les xornaes próximes de competición van celebrase a puerta vacía, una midida que perxudica enforma al Uviéu, yá que'l calendariu dictaba que diba actuar como llocal nes dos, recibiendo de siguío a la Ponferradina y al Deportivo. Mentes, el Sporting viaxa a A Coruña y Alcorcón, siendo nesti casu los inconvenientes pa los 2.000 siguidores roxiblancos que teníen previsto desplazase a Galicia, la mayoría cola intención de facer nueche ellí, y a los munchos yá con reserves na Comunidad de Madrid.

El derbi, previstu pal domingu 29 a les 21 hores, nun ta afeutáu de momento por esta decisión. El pasu de los díes y la evolución de la espansión del COVID-19 motivarán qu'esta midida s'amplíe o non a les dos xornaes siguientes, na que, amás del derbi, el Sporting torna a Madrid pa vese les cares col Rayo Vallecano y l'Uviéu recibe al Fuenlabrada.

22 positivos, ente ellos un xugadores del Mosconia B

Asturies rexistra nestos momentos un total de 22 positivos, siete d'ellos venceyaos al colexu Fundación Masaveu, lo que llevó a parar les clases nel centru. Otru afeutáu ye un xugador del Mosconia B, polo que'l club de Grau decidió suspender tolos entrenamientos.