Díes últimos pa presentar trabayos a ocho concursos de l'ALLA

Pertenecen al Certame d'Investigación y tán abiertos "a obres feches n’eonaviegu y n’asturianu". Complétense cola Olimpiada Escolar de Redaición Urbano Rodríguez.

El domingu ye'l día últimu pa presentar trabayos a los concursos p'adultos qu'entama esti añu l'Academia de la Llingua Asturiana (ALLA). Les modalidaes de los mesmos son recoyida de material toponímico oral; recoyida oral de léxicu asturianu; propuestes de terminoloxía especializada; investigación llingüística o lliteraria; el Xosé Bolado de recoyida de material lliterario inédito anterior a 1970; divulgación de teunoloxía y ciencies naturales; recoyida, trescripción y estudiu de testos orales; y documentalismu sociocultural curtiu.

Mentes, los dedicaos a la reciella, la Olimpiada Escolar de Redaición Urbano Rodríguez, cuenta con dos estayes: el de Primaria, y el de Secundaria y Bachilleratu. Previstu en dos fases, tendrá primero una clasificación en modalidá sincrónica ente tolos inscritos a distancia que va tener llugar el 18 de payares y una final presencial el 21 d'avientu.