Cuatro empreses emerxentes del sector teunolóxicu participen nun alcuentru con inversores

|

El Centru Européu d'Empreses y Innovación (CEEI) acueye un alcuentru de firmes asturianes del ámbitu de la industria 4.0 con inversores públicos y privaos. Les cuatro empreses escoyíes pa participar nesta cita prevista pa la tarde del xueves son Gesinne, Nilsa Telemetric, Blunder y Nanographite.

La xornada, col nome ‘Venture Network’, ye una iniciativa entamada pol Banco Sabadell y l'Institutu d'Empresa en collaboración con socios locales como CEEI Asturies, coles mires de fomentar l'espíritu entamador y facilitar la creación de contautos empresariales. Mientres l'alcuentru, les compañíes emerxentes, amás de tener la oportunidá de conocer inversores pa establecer relaciones, van asistir a una clase maxistral que va impartir el fundador de Visualbox, Jon Oleada, sobre la innovación nos negocios dixitales.

L'alcuentru va empezar a les 18 hores nel edificiu del CEEI, nel Parque Teunolóxicu de Llanera, entidá dependiente de la Conseyería d’Emplegu, Industria y Turismu. Depués de les presentaciones, van tener llugar los contactos –conocíos como networking– pa que les startups y los inversores alderiquen y compartan esperiencies. Torsa Capital, SRP, Nexus Corporate, Sodeco, Canteli Capital, Asturgar, Biocrew y Leverad son les firmes con capital que participen en ‘Venture Network’.

Contador Estadistiques