Convocáu'l VI Certame de Poesía "Nené Losada Rico"

L'Asociación de Muyeres "Valdés Siglo XXI" del Conceyu de Valdés ta acabante convocar el VI Certame de Poesía "Nené Losada Rico", premiu que lleva'l nome de la escritora valdesana, que finó esti pasáu mes d'abril. El certame afita dos modalidaes, en castellán y asturianu, con un premiu de mil euros pa cauna d'elles. El plazu de presentación remata'l 2 d'ochobre.

Nesti concursu puen participar toles persones interesaes, mayores de 18 años, residentes nel Estáu, y que nun fueren premiaes nes anteriores convocatories d'esti Certame. Los participantes presentarán namás un poemariu, orixinal ya inéditu, en castellán o asturianu, con una estensión ente doscientos setenta y cinco versos y un máximu de quinientos. El poemariu nun pue tar premiáu nin pendiente de fallu n'otros certámenes o concursos.

Los trabayos presentaránse por quintuplicáu, baxo plica, firmaos con un nomatu nun sobre ensin remite. Dientro del sobre dirá otru sobre zarráu colos datos personales: nome, apellíos, dirección, teléfonu y un currículu curtiu. Unviaránse per corréu certificáu a la dirección siguiente: Asociación de Muyeres “Valdés Siglo XXI", C/ Los Lagos, s/n, 33787 Barcia (Valdés) Asturies, indicando nel sobre: Pal VI Certame de Poesía "Nené Losada Rico". El plazu d'almisión de los trabayos será dende la publicación de les presentes bases hasta les 14:00 hores del 2 d'ochobre de 2009. Va premiase'l trabayu ganador con 1000 € y Diploma pa cada modalidá.