Héctor Braga: “Munchísimo más importante que los concursos y festivales sedría, al llargu plazu, regular la enseñanza de l’asturianada”

|
Héctor Braga con Anton Chicote 2020

Una enciclopedia del cantar asturiano. Asina llegaron a definir, con aciertu, la tesis doctoral del cantautor y multiinstrumentista Héctor Braga (La Felguera, 1980), entitulada ‘La asturianada. Estudio etnomusicológico de un género vocal de tipología popular’, que recibió sobresaliente cum laude y de la que fala con amplitú nesta entrevista.

¿Cuándo tien orixe l’asturianada?

Entama del vezu de cantar del pueblu y nun ye daqué afitao nel calendariu como una batalla. Son creaciones anónimes, ensin drechos d'autor y fáense, entá güei, nun contestu d'analfabetismu musical total. La poca documentación qu'hai tien que lleese ente llinies y hasta'l mayor espertu topa pilancos. Preseos musicales como la gaita yá taben nos templos nel sieglu XIII y el Reinu d'Asturies ta acabante de cumplir 1300 años nel 2018. Vete a tu a saber... La verdá qu'esti xeitu de cantar ye abondo asemeyáu a les mises de gaita medievales y por eso, colos papeles na mano, sabemos que yá existía nel sieglu XVI magar que, casi de fixo, vien d'enantes...

¿Qué carauterístiques tien?

L’asturianada ye una manera tradicional de cantar que ye bien virtuosa, esixente y perdifícil. Hai que tener potencia y dulzor, fuerza y estilismu y apoderar una rica paleta d’adornos vocales. Ente que les notes musicales van en tonos y semitonos (lo que son les tecles blanques y negres del pianu) les asturianaes tradicionales tienen otres distancies ente les notes, igual que les vieyes gaites. Son anteriores a les músiques tonalizaes y de consumu, nin siquier güei siguen intervalos nin riegles harmóniques convencionales. Tampoco nun tienen ritmu nin compás y tou depende de la capacidá respiratoria del intérprete y la so habilidá pa orniar.

L’asturianada ye una ayalga de la llírica popular, que costitúi l’estandarte del cantar tradicional d’Asturies. Ye daqué xenuino d’Asturies dende va munchu tiempu y la so espansión hestórica nel territoriu español foi tan grande qu’entá vemos parentescos nes rondes sanabreses (Zamora) o les tonaes montañeses (Cantabria), por citar casos evidentes en vieyes demarcaciones alministratives amestaes al Reinu Astur y l’Asturies de Santiyana.

Asina se caltuvo viva a lo llargo y al pasu del tiempu ya inclusive escontra’l tiempu, y a pesar de los tiempos. Ye un xéneru fascinante por tou ello y muncho más.

¿Por qué decidió dedica-y la so tesis doctoral?

Tien un puntu de rebeldía y de compromisu. Yá nos mios tiempos d'estudiante nel Conservatoriu d'Uviéu naguaba porque la música'l mio país tuviere escrito y nes aules, porque nin too yera Beethoven nin yera normal que daquien riérase de min porque tocaba la gaita y cantaba asturiano. La música'l país ye tan respetable como cualisquier otra, y más si ye la del país tuyu. Por eso al terminar chelo n'Uviéu colé pa Salamanca, y en 4 años llicenciéme como etnomusicólogu na vieya cátedra de Miguel Manzano.

Na música tradicional codifícase lo que sabe’l pueblu, pero tamién lo que siente; lo que cree y lo que fai. Ye lo que recibimos oralmente y pasa d’una xeneración a otra. Y too eso, no que cinca a l'asturianada, taba ensin escribir nin catalogar nel tarrén musical.

Esti estudiu quedóme en más de 600 páxines y cuasique 500 audios. Toma la evolución hestórica del xéneru dende los sos primeros datos y grabaciones hasta los concursos de posguerra y l’añu 1966. Inclúi un catálogu de cantantes y grabaciones y un estudiu etnomusicolóxicu completu de la relación testu música, la semántica lliteraria, fonética, fonoloxía, diglosia, los acompañamientos, los estilos tradicionales d’interpretación, les melodíes... A dicir del director de la mio investigación, que güei ye’l decanu de la facultá de Filosofía y Lletres, el mio trabayu ye prácticamente una enciclopedia del cantar asturiano. Toi mui orgullosu qu'algamare'l cum laude, que ye la nota más alta posible. Nun ta mal pa un nietu de mineros de la cuenca'l Nalón (risotiaes).

Teniendo en cuenta que’l periodu qu’abarca llega hasta’l 1966, ¿tuvo dificultaes p’atopar materiales d’estudiu?

Munches porque ta too disperso, n'archivos y ‘depósitos’ públicos y privaos. Nun hai censos discográficos, lliteratura académica, catálogos sonoros, centros d'estudios... Ye una llaceria y lo poco qu'hai escrito son averamientos de xente que nun se mete nel tarrén musical, que ye lo que fai falta pa que los cantantes nun sigan imitando grabaciones.

¿Qué rescamplaría de la so investigación?

La clasificación musical del xéneru ye un finxu perimportante. El métodu de transcripción y el catálogu d'audios qu'amiesto, de 480 pieces, ye un material bien granible pa desendolcar na formación de cantantes, que ye'l retu qu'hai anguaño.

¿Llevó dalguna sorpresa?

Munches. La más gorda en Genève (Suiza) aú topé una centena de grabaciones feches n'Asturies en 1952 pol etnomusicólogu rumanu Brailoiu. Presentéles yá catalogaes nel VII Congreso de la Sociedad Española de Musicología, nel añu 2012, y foi un ésitu abondo importante pa min dientro de la comunidá académica.

¿Cuál foi’l momentu de mayor esplendor de l’asturianada?

Sobro’l prestixu dicía Juanín de Mieres qu’ellos facíen callar a doscientes presones que taben dando voces n’un llagar. Qu’un campión nun precisaba micrófonu.

Quiero dicir qu'enantes de los concursos de posguerra y de 1936, los cantantes asturianos yeren famosos y actuaben en teatros apinaos de públicu en Madrid, Barcelona, etc. Vistíen de traxe, rifábenlos les muyeres y yeren lo más paecío a los bluesman americanos. Nun vivíen puramente de cantar, pero yeren bohemios tan conocíos que faíen xires d’actuaciones y grababen discos. Dalgunos inclusive fueron tan estraordinarios que, al nun tener estudios musicales de dengún tipu, la xente abarruntaba qu’apautaren col degorriu, casu de Xuacu'l de Sama o Pepe'l Pantusu.

¿Cómo ye anguaño la salú del xéneru?

Nunca recuperó’l statu quo anterior a 1936, pero tampoco nun puede dicise que tea mal de siguidores, por bien mayores que seyan (y de fechu sonlo, pero l’asturianada inda nun ye la espina dorsal de nengún proyectu musical potente y de futuru).

Per otra parte, yo nun quiero ser absolutamente negativu al respeutive de les televisiones y a los talent-shows porque formen parte de la cultura popular, pero creo qu’hai que compensar la so repartida de comida preparada con otru estilu de cocina casera, camudar el fast-food del pop facilón pola asturianada, nuesu slow food. Camudar la Coca-cola pola sidre. Hai que dexar vivir a otres sonoridaes fora de la música prefabricada o d’ivernaderu y da-yos cancha.

Aidaría aniciar y regular un circuitu de concursos y un gran campionatu asturianu, con premios llambionos, xuraos cualificaos, normes afayadices, distintes categoríes y gales retresmitíes en prime time per radiu y televisión. Pero con calidá, como faen los andaluces o los gallegos. Eso crearía públicu y demanda. Atalanto que ye meyor invertir asina, nun circuitu añal, que gastar seyes mil euros nuna única gala y decidir el ‘meyor cantar’ o coses pol estilu. Ye meyor dar trabayu a cientos de persones tol añu que namás nun día, ¿non?

¿Supunxo dalgún cambiu la so declaración como Bien d’Interés Cultural (BIC)?

Supunxo un puntu de partida y ye un consensu institucional abondo importante (RIDEA, Universidá, Academia de la Historia, Ministeriu de Cultura…).

A ver, munchísimo más importante que los concursos y festivales sedría, al llargu plazu, regular la enseñanza de l’asturianada, porque se canta apenes el 20 por cientu de lo qu’hai. Nun sedría daqué malo y nun va significar la muerte del xéneru. L’asturianada siempres tuvo nel campu y el chigre. Naide nun la quier sacar d’ende. Pero lo mesmo que la gaita, va tener qu’entrar nel conservatoriu.

Ainda güei prautíquense nun contestu d’analfabetismu musical total mentes que’l flamencu o’l cant d’estil valencianu lleven años nos conservatorios. Onde les lletres falen, les barbes callen. El purismu ye una tontura p’aficionaos intolerantes que nun entienden cómo funciona l’arte y viven permanentemente nel pasáu.

Ta claro que lo que nun s’escribe esapaez con mayor facilidá y un entítulu profesional de música ye una acreditación importante, implica que pasasti rigoroses escales de conocencia sobro lo que cantes. Lo que nun s’escribe esapaez con más facilidá, y creo firmemente que la escritura ye la única esperanza que mos queda.

La declaración BIC foi un primer pasu pa qu'entame esti procesu y pa que'l xéneru espoxigue y bilte a mediu-llargu plazu.

Enantes de defender esta tesis asoleyó un discu centráu tamién asturianda entituláu ‘Fundamentos’.

‘Fundamentos’ ye un trabayu enorme qu'asoleyé nel 2019, un triple CD d’ortodoxa del cantar asturianu interpretáu con munchu rigor hestóricu nel qu'andecharon trés pianistes y ocho gaiteros.

Foi un retu personal porque, pa min como cantante, foi un Himalaya remanar tou esi repertoriu tradicional tan estremáu y bayurosu.

Quiero dicir que nun ye un discu folclor, sinón de música antigua asturiana. Amás de los vieyos manuscritos decimonónicos pa voz y piano que taben desaniciaos, asoleyamos una bona riestra de gaites orixinales d'aquella dómina pa grabar con criterios hestóricos. Gracies al trabayu de Chus Solís, nel taller, y al gabitu de tolos propietarios qu'andecharon, suenen gaites de Cogollu, José La Piedra, Maquilo, Pachu Turón, Antón de Sebrayu y Marcelo del Fresno, y otres ayalgues ensin catalogar entá, como una gaitona tumbal que tocó'l gaiteru Lliberdón y de facedor desconocíu.

Con casi 150 años d'hestoria, son les mesmes gaites qu'acompañen asturianaes nes grabaciones d'aquellos vieyos discos de pizarra qu'entá güei son la referencia nel xéneru pola so calidá musical.

¿Qué repertoriu tien y cómo lu escoyó?

El criteriu foi musical, ordenando los temes polos estilos melódicos. Dempués prestamos atención a les pieces de más altor y les versiones más granibles. Ta casi too: ‘Voi pa Llanes’, ‘Les cuatro Poles’, ‘La llinia trazada’, ‘A la Pipiona’, ‘Soy pastor’, ‘A la salía del Sella’, ‘Al pasar per el puertu’, ‘Carromateros’, ‘La cabra cuca’, ‘La vaca pinta’, ‘Si estimes el mio querer’, ‘La cárcel de Llaviana’... Son 75 asturianaes a pelo, con gaita o pianu, pero tamién hai munches desconocíes pal públicu en xeneral. Dellos collacios, como Silvino Antuña (dep), Alfredo Canga, Óscar Roces, Javier d'Arroes o Luis Estrada empobináronme a grabar vieyos repertorios escaecíos, porque son bien guapos y casi naide los conoz.

Recién recopiló en ‘Memoria Folk 2004-2014’ temes grabaos nesi periodu de tiempu. ¿Por qué se decidió a ello?

Tengo asoleyaos 5 LPs, un triple CD, 2 EPs y 6 cenciellos hasta la fecha. Prestábame tener tamién un recopilatoriu. Son casi dos hores y media de grabaciones d'estudiu y en direuto (dalguna inédita) de la meyor época que tuvi de conciertos. Ta en plataformes dixitales dende va poco y prestábame compartir eso na rede.

¿Cómo ta siendo’l branu con respeuto a los conciertos?

Yá fice delles presentaciones de ‘Fundamentos’ n'Asturies. Hai más feches roblaes n'ochobre (11 en Villaviciosa y 22 en Grau) y pola mor del Xacobéu, tamién n'avientu (27 en Colunga). Va poco fice una banda sonora pa la serie ‘Tierra de quesu’, de Pablo Casanueva y Lluis Nel Estrada, qu'emitió TPA, y prestóme porque la lletrónica ye un tarrén que namás tenía pa mio casa y pal trabayu con rapaces.

Fuera d'Asturies tuvi esti branu nel Tolofolk d'Euskadi, y nel internacional de zanfona en Rianxo (Galiza). Ellí hai financiación y bon criteriu. Enxamás cansaré de dicílo. Llevo bien d'años tocando más fuera d'Asturies que dientro, y non namás yo.

¿Ta trabayando agora en más proyeutos?

Anguaño preparo material folk y tradicional del país, como siempre, y adulces voi asoleyando tamién una collecha de cantares en castellán nes plataformes dixitales. Si quies gustar a tol mundu, nun vas gustar a naide. Eso me dicía Arcadio Calvo, un gran amigu ya informante qu'amás protagoniza dellos temes nel mio primer discu ‘Encoplando’. Va tiempu que tenía gana facelo y, como siempre faigo lo que me da la gana, pues ehí sigo.

Na semeya, Braga acompaña a la gaita a Antón Chicote nel 2020.

Contador Estadistiques