Asturies

Esti miércoles cúmplense 30 años de la celebración de les primeres eleiciones democrátiques a la Xunta Xeneral. El socialista Pedro de Silva resultó ganador d’esta cita colas urnes na que l’asturianismu tuvo representáu pol Ensame.

Esti xueves va tener llugar una movilización previa a la fuelga convocada na educación pública pal 9 de mayu. La comunidá educativa va entamar zarros y actividaes reivindicatives contra la Llei Wert y los recortes nel sector.

Mieres yá ta preparada pa vivir trés díes de celebraciones. Llega la Folixa na Primavera, actividá que trai esti sábadu a Asturies a Rua Mcmillan. L’escocés va xubir al escenariu del Parque Xovellanos tres l’actuación de La Tarrancha.

Dende esti miércoles, y hasta’l 15 d’avientu, nun se podrán recoyer oricios na costa asturiana. La Conseyería d’Agroganadería y Recursos Autóctonos establez per primer vez un periodu de veda pa esti equinodermu.

Esta fin de selmana La Pola Ḷḷena ta de folixa. Celébrense les fiestes de La Flor y, per décimu añu, el Mercáu Tradicional nel barriu La Caleya, onde destaca la Nuechi Folk del sábadu colos grupos llocales La Coḷḷa Propinde y Spanta la Xente.

Alredor de cien chigres van ufrir una cazuela y una botella de sidra d’escoyeta pol preciu de 3 euros ente’l 15 y el 21 d’esti mes. La primer mesa de preba d’esta sidra fecha con venti variedaes de mazana autóctona celébrase esti miércoles.

Uviéu continúa ensin entrar nel Consorciu de Tresportes d’Asturies (CTA)  y los ciudadanos siguen sufriendo los inconvenientes de nun poder usar el billete únicu. Compromisu por Uviéu afala al alcalde pa que solucione esta situación.

Una delegación asturiana encabezada pol presidente Javier Fernández ta de visita per América pa establecer rellaciones comerciales. Amnistía Internacional solicitó al Gobiernu que nun escaeza los Derechos Humanos nel so viaxe.

‘Crisis, anticapitalismu y derechu a decidir de los pueblos’ ye’l nome del ciclu de charres qu’entamen Izquierda Asturiana (IAS) y Izquierda Anticapitalista nel Atenéu Obreru de Xixón. Ésti va principiar esti martes y va allargase hasta’l vienres.