L'estáu actual de les cercaníes ferroviaries n'El Nalón, a alderique

Aína axunta a representantes de sindicatos y consumidores pa tratar esta cuestión.

L'agrupación llocal de la formación asturianista n'El Nalón entama l'alderique '¿Y si la Cuenca’l Nalón tamién sube al tren?' p'analizar l’estáu actual de la rede de cercaníes na zona y los oxetivos qu’esta rede tien qu’algamar pa convertirse nun estímulu socioeconómicu auténticu de la fastera. En concreto los trés participantes van tocar cuatro bloques temáticos: diagnósticu de la situación actual de la rede ferroviaria de cercaníes; propuestes de midíes a curtiu y mediu plazu pa meyorar y da-y vuelta a la situación; beneficios socioeconómicos que tendría pal valle una rede ferroviaria moderna y eficiente; y debate col públicu.

Los convidaos por Áina son la secretaria de Comisiones Obreres (CC OO) d'El Nalón, Esther Barbón; el presidente de la Unión de Consumidores de Asturias, Dacio Alonso; y el representante del Sindicatu Ferroviariu d’Asturies y miembru de la Intersindical Asturiana, Andrés Nicieza. La cita va ser el vienres a les 18.30 hores en Sama, na Casa Cultural Escuelas Dorado.

"Con esti eventu, l’agrupación llocal d’Aína anima a los vecinos y les vecines del Nalón y al texíu asociativu a participar pa poder siguir avanzando na reclamación d’unes cercaníes ferroviaries dignes, modernes y eficientes que meyoren la vida y la economía de les vecines y de los vecinos d’esta comarca minera", apunten.

Na semeya, estación de La Pola Llaviana.