“Hai una posibilidá real d’eliminar el peaxe del Güerna”, considera Ripa

La Comisión Europea entiende que l’ampliación de la concesión de l’autopista del Güerna “infrinxó les normes de la XE” y da dos meses al Estáu pa dar esplicaciones. El denunciante, l’ex secretariu xeneral de Podemos, Daniel Ripa, ve posible la supresión del portalgu.

“Esta comunicación anticipa per primer la posibilidá real d’eliminación del peaxe en non munchu tiempu”, asegura l’aragonés a Asturies.com un día depués de recibir una carta firmada por Salvatore d’Acunto, xefe d’unidá de la Direición Xeneral de Mercáu Interior, Industria, Entamamientu y Pymes. “Agora yá hai una base llegal”, rescampla al tiempu qu’esplica que “lo que pasaba ye que la xusticia española nos dicía, el Tribunal Supremu, que taba prescrito, qu’asocediera nel añu 2000 y que nesi añu nengún partíu denunció l’alcuerdu d’Aznar, polo que yá nun se podía facer nada magar que l’ampliación de la concesión entrara a valir nel añu 2021”.

“Ye una noticia relevante porque ye la primer vez que la Comisión Europea diz que’l peaxe del Güerna incumplió la llegalidá comunitaria”, sigue Ripa. Una comunicación que “vien a dicir que nun foi llegal la forma na que s’amplió la prórroga del peaxe del 2021 al 2050 nel Gobiernu d’Aznar y Álvarez-Cascos, nel añu 2000, y da dos meses a España pa que presente les alegaciones”.

En concreto, treslládase al denunciante la decisión de “ampliar el procedimientu d’infracción INFR(2021)4052 per aciu l’unvíu d’una carta d’emplazamientu a España”, que correspondía a la prórroga de la concesión de l’autopista de peaxe gallega AP-9, incorporando la de l’AP-66 Lleón-Campumanes “asina como la venta pública nel añu 2003 de la Empresa Nacional de Autopistas, S.A. (ENAUSA), titular de les aiciones de les concesionaries de l’AP-9 y de la AP-66, pola Sociedá Estatal de Participaciones Industriales (SEPI)”.

“La Comisión considera que tanto eses dos prórrogues como esa venta pública, al nun ser precedíes de la espublización d’un anuncia de llicitación nel Diariu Oficial de les Comunidaes Europees y d’un procedimientu de contratación pública, vulneraron la Direutiva 93/37/CEE y los principios xenerales d’igualdá de tratu y tresparencia que rixen les normes de la contratación pública”, esplica’l testu.

Nel casu de l’AP-9, sería’l segundu espediente depués del notificáu en setiembre del 2021, qu’animó naquel momentu a la denuncia asturiana. Les alegaciones presentaes entós pol Executivu estatal seríen insuficiente pa la Comisión Europea.

Encamientu al Gobiernu estatal

El procedimientu d’infracción, según una información espublizada pola Comisión Europea na so páxina web, lleva al organismu a encamentar “a España y Hungría a que cumplan les normes rellatives a los contratos de concesión d’autopistes”. Nel casu concretu español, especifica que “España amplió la duración de dos concesiones d’autopistes ensin aplicar de forma adecudada los procedimientos de llicitación, lo qu’infrinxó les normas de la XE”.

“España y Hungría”, con un casu asemeyáu, “disponen agora de dos meses pa responder a les alegaciones presentaes pola Comisión; de lo contrario, la Comisión podría optar por unvia-yos un dictame motiváu”. Ripa esplica que cola respuesta dada pol Executivu estatal va facese “un informe de propuestes, de midíes a tomar”.

“Una vez que la Xunión Europea diz que ye illegal, lo que paez previsible ye que va caltener esi dictame nel informe de midíes y eso llevaría, ente amplies propuestes, probablemente a la supresión del peaxe. Yá hebo un casu asemeyáu n’Italia, na autopista de Livorno, que desembocó neso”, recuerda.

Lo que ye seguro ye que lo que decida la Comisión Europea será d’aplicación inmediata. “Nel 90 por cientu de los casos cúmplense al momentu porque si non Europa multa a España por cada día qu’incumpla la sentencia”, rellata Ripa.

Un "despropósitu total"

Los dos procesos, el gallegu y l’asturianu, van agora xuntos “y la solución va ser idéntica pa les dos víes”. Al respeuto, l’aragonés, agora fuera de la política, esplica que “cuando organizamos los espedientes descubrimos que non sólamente nun había nengún interés xeneral na ampliación de l’autopista del Güena, sinón qu’una de les contrapartíes que paez qu’hebo foi facer obres en Galicia. Digamos que se xustificó diciendo qu’ampliamos el portalgu y l’interés xeneral ye que vamos facer unes obres en Vigo onde l’AP-9”.

Una situación que fai confirmar a Ripa que la decisión del Gobiernu d’Aznar “foi un despropósitu total: ampliamos la concesión 29 años pa beneficiar a una empresa y pa facer obres n’otros territorios”. Dalgo que califica de “llamentable, tratando siempre a los asturianos como si fóramos menos de los demás”.

Por esto, l’avance de la denuncia “ye una mui bona noticia” y una satisfaición personal depués de “dos años bastante difíciles con munchos ataques, inclusive de fuera”, en referencia a la ultraderechista Manos Limpias. “Cuando yo punxi esta denuncia énte la Comisión Europea la propia organización criticóla porque que dicíen qu’ésa nun yera la vía, que nun tenía nengún percorríu, y que la solución yeren les bonificaciones, que yá vimos que pa la mayoría de los usuarios del Güerna nun supunxo nengún cambiu, un pequeñu descuentu si viaxes muncho al mes”.

“Nun foi fácil entamar esti procesu, foron dos años y mediu de collaborar cola Comisión pa qu’hubiese una resolución positiva y con muncha satisfaición de que sirvió”, conclúi Ripa, que fai una reflexón: “Si al final un pequeñu grupu de persones consigue llevar un asuntu a Europa y ganar un xuiciu al Gobiernu d’España con unes implicaciones económiques mui fuertes, la entruga ye ónde taben los representantes de los asturianos y por qué nun fixeron eso en tou esti tiempu. Por qué un Gobiernu que tien recursos nun ye quien en décades d’encargar un informe xurídicu y entamar un procesu xudicial pa ver cómo se podría suprimir el peaxe. Nun lo quixeron facer, a saber a qué interes económicos respondieron, y al final yo creo que ye de xusticia y que si lo consiguimos sacar alantre, entovía queden meses, sería una perbona noticia p’Asturies, que va tar menos aisllada y menos discriminada”.

Na semeya, Ripa'l 5 d'ochobre del 2021 muestra la denuncia na puerta de la oficina llocal de la Comisión Europea n'España, asitiada en Madrid.

¡Hoy celebro una victoria histórica! La Unión Europea declara por primera vez ilegal la ampliación hasta 2050 del peaje del Huerna (AP-66), dando la razón a mi denuncia ante la Comisión Europea del 28 de Septiembre de 2021. Este fallo acerca el fin del peaje Asturias-León. (1/6) pic.twitter.com/4cokzsefe6

— Daniel Ripa (@Daniel_Ripa) April 24, 2024