Xuníes Podemos va presentar una enmienda pa equiparar la partida pa l’ALLA cola del restu d’academies

283.170 euros ye la diferencia esistente ente les perres que recibiría l’Academia de la Llingua Asturiana (ALLA) de los Presupuestos Xenerales del Estáu (PXE) con respeuto a la Real Academia Galega y l’Institut d’Estudis Catalans. Xuníes Podemos va presentar una enmienda pa equiparar la partida a la d’estes instituciones homólogues.

La diputada Sofía Fernández Castañón anunciólo esta mañana depués d’aconceyar con Xosé Antón González Riaño, presidente de l’ALLA, nel llar social de la cai L’Águila pa falar de les posibilidaes presupuestaries de la promoción de la llingua asturiana dientro de los PXE. “Entendemos, y asina entiende tamién l’Academia, que tien qu’equiparase l’aportación del Estáu a l’Academia de la Llingua Asturiana cola que fai tamién a otres academies d’otres llingües tanto pol llabor que fai l’ALLA como tamién pola relevancia que tien el reconocimientu de les llingües propies d’Asturies, l’asturianu y el gallego-asturiano”, aición que tamién valga “p’algamar la normalidá nel tratamientu de les llingües d’Asturies y el reconocimientu de los derechos de les y los falantes”, ensin escaecer que l’oxetivu más importante nesti sentíu sigue siendo “la reforma del Estatutu d’Autonomía pal reconocimientu de la oficialidá”, rescampló la tamién coordinadora autonómica de Podemos.

Nos Presupuestos del 2021, per primer vegada, la institución asturiana recibió una aportación del Estáu, 40.000 euros, partida que se repitió nos d’esti añu. Pal proyeutu de cuentes del 2023 ésta aumenta en 10.000 euros, hasta 50.000, lloñe de los 267.500 de la Euskaltzaindia, que contaba con 220.000, y de los 333.170 de la Real Academia Galega y l’Institut d’Estudis Catalans, entidaes que veníen contando con 311.380.

L’ALLA, pela so parte, apuntó del alcuentru que nel mesmu “sorrayóse la importancia simbólica de que l’Academia, como institución llingüística cimera d’Asturies, cunte dende va tres años con una aportación económica del Estáu”. Considera que “ye una reconocencia esplícita de la identidá llingüística asturiana que, sicasí, habría completase con otres partíes presupuestaries destinaes a encontar, acordies cola Constitución Española, el procesu de recuperación y dignificación llingüística n’Asturies”.