Ye 23 de xunu y celebramos la Nueche de San Xuan
La nueche del 23 de xunu, la Nueche San Xuan, ye máxica. Celebramos el solsticiu de branu y facemos cultu al fueu y al agua cola quema de fogueres y l’enramáu de fontes nesta folixa de raigañu celta que recupera esti añu la normalidá. ¿Yá sabes ónde vas festexala?
Depués de dos años nes que nun se pudieron celebrar grandes folixes nesta fecha, por fin vamos poder recuperar les fogueres nes ciudaes, pueblos y barrios d’Asturies. Ésta priéndese na medianueche como cultu al sol na nueche más curtia del añu –realmente ye’l solsticiu de branu, nel pasu del día 20 al 21, pero la Ilesia católica treslladó esta celebración pagana pa coincidir con San Xuan Bautista– y báillase la danza prima al rodiu la mesma.
Tamién ye importante l’agua nos ritos d'esta xornada, yá qu’esti día ye cuando y posible atopar la flor d’agua, que surde per un instante colos primeros rayos de sol de la mañana según la lleenda, trayendo amor, belleza y salú al que da con ella. Tamién ye la nueche na que les xanes salen de les sos cueves, siendo posible veles nes fontes.
L’enramáu de les fontes ye otra de les guapes tradiciones de San Xuan. Pa conocer más detalles sobre les tradiciones d’esti día pues consultar el nuesu reportaxe especial d'A la Gueta los Suaños calcando equí.
Tamién tienes a golpe de click el cuentu animáu 'L'encantamientu', que se desendolca en San Xuan.