"Malva y el papapallabres"
Autora: Marisa López Diz
Ilustraciones: Elena Fernández
Editorial: Pintar-Pintar. Uviéu, 2010
Marisa López Diz y Elena Fernández vuelven axuntase pa falanos de les aventures de Malva, aquella neña que descubrimos con "Malva y el paragües máxicu", cuentu que viaxara a Chile pa engordar les Biblioteques escolares del país andín.
Nesti casu Malva tien d'encarar el misteriu de la desapaición de toles pallabres de los llibros de la rodiada: el colexu, la so casa... y pa facelo demostrará la mesma intelixencia ya imaxinación que yá nos demostrara nel llibru anterior. Asina Marisa López Diz, autora de Lliteratura Infantil y Xuvenil bien conocida polos neños asturianos afilbana una historia amable, entretenida y de la que rescampla l'usu d'un pallabreru bien guapu. Asina rescatamos palabres y espresiones como "escolingar", "carretar", "afuracar", "recebar el focicu" o "enguedeyu", qu'axuntaes a les munches otres pallabres guapes qu'apaecen nel llibru, aseguren que nenguna Bruxa Xenara nin nengún Papapallabres les faiga desapaecer.
L'álbum, editáu dientro de la colección de Lliteratura Xuvenil de Pintar-Pintar, pue tar indicáu pal Segundu Ciclu d'Educación Primaria.
Biblioteca
"El dinosauriu, el príncipe, la nena y la so ma"
Autor: Miguel Rojo
Ilustraciones: Carlos Álvarez Cabrero
Editorial: Pintar-Pintar. Uviéu, 2010
"Cuando espertó, el dinosauriu tovía taba ellí". Cola célebre frase de Monterroso entama esta historia que nos traza, pente medies de la xuntura de situaciones sorrealistes con otres bien reales, una narración fresca, humorística y con dellos trazos de crítica social.
El personaxe del dinosauriu buenu, el príncipe encantáu, la nena imaxinativa y capaz de tomar les sos propies decisiones y la ma que yá nun tien tiempu pa suañar, formen non solo'l títulu d'esti álbum ilustráu, sinón tamién la constelación de personaxes que dan vida a esti cuentu modernu.
Miguel Rojo, un autor imprescindible de la nuestra Lliteratura Infantil y Xuvenil, vuelve a dar nel clavu con un álbum que pue gustar cásique a tolos públicos que quieran y-yos apeteza averase a él.
Autor: Carme Martínez Pérez
Ilustraciones: Carme Martínez Pérez
Editorial: Trabe. Uviéu, 2009
Carme Martínez vuelve a averase nesti llibru a la xuntura ente cuentu tradicional y cuentu xuvenil na que se desenvuelve con tanta traza. Nesti casu ye Macame, una rapacina que ta nesi difícil momentu que va de la neña a la moza, la que fai d'involuntaria protagonista de la historia. Martínez, usando'l guapu recursu del llibru misteriosu que-y da a Macame una vieya nel mercáu, va saltando de les fábules y cuentos tradicionales qu'apaecen nel exemplar, a les histories cotidianes d'una rapacina a la que'l mundu de los adultos sigue paeciéndo-y incompresible.
Como yá pasara coles obres de la autora "Cuentos pa una nueche de lluna" o "Morfema, mormefa, mormera", "Cuentos maraviyosos de mieu y misteriu" resulta un llibru mui recomendable pal públicu xuvenil, rescamplando amás como nestos les ilustraciones de la propia autora.
Autor: Francisco Álvarez Velasco
Ilustraciones: Fernando García-Vela
Editorial: Pintar-Pintar. Uviéu, 2009
El poeta Francisco Álvarez avérase nesti álbum ilustráu a la lliteratura pa los más neños pente medies d'una historia cuntada en versu que parte de la lleenda tradicional china sobre l'orixe de les solombres de la lluna. Rescampla del testu la sensibilidá nel usu de les palabres y la orixinal descripción del suañu de la propia llebre que-y da forma a la lluna. Acompañen los versos unes guapísimes ilustraciones de Fernando García-Vela que faen del guapu resultáu autoría verdaderamente compartida.
Autor: Francisco Pimiango
Ilustraciones: Francisco Pimiango
Editorial: Ámbitu. Uviéu, 2009
Tila, Tula y Tela son tres bruxes y amás, hermanes. Por embargu poco tienen que ver coles que se nos presenten n'otros cuentos de lliteratura infantil y xuvenil como'l míticu llibru de Roald Dahl "The Witches". Estes bruxes sueñen con llograr "Gran prueba" que-yos otorgue la verruga de verdaderes bruxes. Pa ello, non solamente van tener que pasar una serie de pruebes, sinón que tamién tendrán que ponese a prueba como bruxes y, sobre manera, como persones.
Prestosa historia que va acompañada por unes guapísimes y detallistes ilustraciones del propiu autor.
Autora: María Luz Pontón
Ilustraciones: Covadonga Valdés Moré
Editorial: Trabe. Uviéu, 2009
Gochón ye un gochu especialmente gochu pal que lo de nun llavase nun ye namás una marca de fábrica sinón tamién una filosofía de vida. Nun ye solo "l'alerxa que sentía hacia'l necesariu aséu diariu" ye qu'amás llega a documentase sobre les persones que, a lo llargo de la historia "amosen el so poco apegu al agua".
Simpáticu cuentu nel que l'autora, pente medies del humor y les situaciones disparataes, avera a los más mozos a los hábitos d'hixene. Rescampla, amás del propiu argumentu, lo afayadizo del rexistru llingüísticu y l'usu constante de xiros netamente asturianos.
Acompañen al llibru una serie de conseyos y orientaciones didáctiques pa padres y maestros.
Autora: Fátima Fernández Méndez
Ilustraciones: S. Bimbo
Títulu: Nora la neña de sal
Editorial: Pintar-Pintar. Uviéu, 2009
Nora ye una neña que mira toles nueches como so pa sal a la mar a la busca d'estrelles. Ella, que diría encantada con él, tien que quedar en casa porque ye una neña mui especial a la que'l contactu col agua de la mar podría perxudicala. ¿O non?.
Sobre esta guapa premisa Fátima Fernández Méndez desarrolla un cuentu redondu que resulta efectivu al tiempu que cenciellu. A la narración acompáñenla les orixinales ilustraciones de S. Bimbo, descubrimientu pa la LLIX n'asturianu qu'aporta frescura a un testu que, na so versión n'asturianu, pue llegar a resultar pesáu pol usu d'un léxicu quiciabes poco afayadizu pal públicu al que va empobináu.
Autora: Berta Piñán
Ilustraciones: Elena Fernández
Títulu: Arroz, agua y maíz
Editorial: Pintar-Pintar. Uviéu, 2009
El testu que da cuerpu a esti álbum ilustráu resultó ganador de la I edición del Premiu MªXosefa Canellada convocáu pola Conseyería de Cultura. Trátase d'un conxuntu de poemes nos que Berta Piñán afilvana con una sensibilidá estraordinaria la vida de cotidiana de diferentes neños y neñes en diferentes partes del mundu. Si a esto sumamos les maraviyoses ilustraciones d'Elena Fernández y la cuidada enmaquetación y edición el resultáu ye un álbum ilustráu que resulta un regalu pa tolos llectores mozos (y non tan mozos) de lliteratura n'asturianu.
Autora: Carmen Gómez Ojea
Ilustraciones: Blanca Prendes
Títulu: Arbolín
Editorial: Pintar-Pintar. Uviéu, 2009
Carmen Gómez Ojea regresa a la Lliteratura infantil n'asturianu con esti álbum ilustráu que fala de la rellación ente una neña, Queti, y un árbol mui especial col que fala nel parque. Na imaxinación de la neña l'árbol, qu'en realidá ye una salguera, camuda nuna fada col pelo verde y cimble lo mesmo que les sos rames.
Llibru con munches posibilidaes no tocante al trabayu de valores venceyaos a la ecoloxía y el respetu a la naturaleza colos neños y neñes del segundu ciclu de Primaria.
Autor: Xulio Berros
Ilustraciones: Enrique Carballeira
Títulu: Toya yá ye grande
Editorial: Academia de la Llingua Asturiana. Uviéu, 2009
Ún de los personaxes más conocíos de la Lliteratura Xuvenil n'asturianu creada pol escritor y maestru Xulio Berros, Toya, va faciéndose mayor. Con esa mocedá llega tamién la necesidá d'encarar temes como la muerte d'un familiar, les rellaciones colos compañeros y maestros de la escuela, o la creación d'una personalidá propia.
Guapu cuentu que, pola so cercanía a les circunstancies personales de los neños y neñes, de seguro que-yos resulta bien prestosu.
