Yá se conocen los diez centros ganadores del concursu escolar ‘Al son del cantar’

‘El mañá das grandalesas’, ‘Les fiestes del añu’ o ‘Marineru’ son dalgunos de los temes compuestos por escolinos que grupos musicales reconocíos del país van versionar faciéndolos suyos. El concursu ‘Al son del cantar’ llega a la segunda fase, que se va rematar cola edición d’un discu y l’entamu d’una gala en mayu.

Centros educativos de Primaria y Secundaria de los conceyos de Cuaña, Navia, Grandas de Salime, Xixón, Cangas del Narcea, Grau, Nava, Sariegu, Ḷḷena, Gozón, Carreño y Castrillón, convocaos polos servicios de normalización llingüística de cada llugar, participaron nesta edición del concursu creáu nel 2019 baxo’l nome de ‘El mio cantar’. Destináu p’alumnes y alumnos de cuartu de Primaria a segundu de la ESO, consiste na composición d’una canción con lletra propia n’asturianu o gallego-asturiano sobre una melodía tradicional o orixinal.

Los ganadores nesta primer fase del concursu foron el CPEB El Salvador (Grandas de Salime), con ‘El mañá das grandalesas’; el CP Darío Freán Barreira (Cuaña), con ‘Xantar’; l’IES Cangas del Narcea (Cangas del Narcea), con ‘Cantu a les muyeres’; el CRA Lena (Ḷḷena), con ‘La madreña de mio güela’; el CP Virgen del Fresno (Grau), con ‘Les fiestes del añu’; el CP San Félix (Carreño), con ‘¿Quién será?’; el CRA Cabu Peñes-San Jorge (Gozón), con ‘Protesta animal’; l’IES Peñamayor (Nava), con ‘¡Ye que me presta tanto!’; el CP Salvador de Vega Berros (Sariegu), con  ‘Gárrate bien fuerte’; y el CP Ramón de Campoamor (Xixón), con ‘Marineru’. El xuráu del premiu valoró la implicación de los centros, la orixinalidá de les propuestes y la tresversalidá que munchos centros consiguieron col proyeutu, implicando a bona parte del profesoráu de distintes asignatures.

‘Al son del cantar’ entra agora na segunda fase, na que les composiciones ganadores van ser versionaes por grupos con trayeutoria de la zona poniendo’l so sellu personal y ofreciendo un resultáu que va poder recoyese nun CD. Amás va entamase una gala en mayu nel que se van interpretar los cantares ganadores en direuto.

Esta inicitiva, na que participa la Conseyería de Cultura, Política Llingüística y Turismu, tien l’oxetivu d’estimular l’aprendizaxe del alumnáu al traviés de la investigación, el descubrimientu y la creatividá nel campu de la música.