Les bones ventes de ‘Astérix El Galu’ aseguren traducciones futures nueves

La tirada de 1.000 exemplares de ‘Astérix El Galu’, na cai dende’l xueves’, ta cerca de distribuyise na so totalidá tres el bon recibimientu del públicu. Esti ésitu nuevu lleva a Distribuciones Terrier a pensar nel asoleyamientu nel 2015 del númberu 2 de la coleición al empar que l’aventura nueva d’Astérix y Obélix, la 36.

Los responsables del primer númberu de la coleición del galu y de ‘Astérix na tierra los pictos’ l’añu pasáu, dambos baxo la edición de Bruño Salvat –empresa poseedora de los derechos de los cómics–, nun acaben de sorprendese pol recibimientu de les histories del galu y el so compañeru Obélix en llingua asturiana. Si los 2.000 exemplares de l’aventura d’Astérix en tierres escoceses s’escosaron l’añu pasáu, superando inclusive les ventes en castellanu n’Asturies, la qu’abrió la lleenda d’esti personaxe creáu por René Goscinny y Albert Urdezo nel 1959 lleva’l camín de repetir el mesmu ésitu. Por esti motivu, Javier Melón, alministrador de Terrier, nun descarta ampliar la tirada y yá piensa en proyeutos nuevos.

“Les ventes de momento son espectaculares y yá queden pocos exemplares”, afirma Melón, que tamién confió en María Xosé Rodríguez López pa la torna al asturianu de ‘Astérix El Galo’. “Taríemos encantaos de qu’ella fora la responsable de traducir tola coleición”, añade al mesmu tiempu que dexa cayer les intenciones de la editorial xixonesa. Y ye que’l númberu dos de la coleición d’Astérix, de nome ‘La foz d’oru’, será una realidá l’añu qu’entra. “Ye posible que la saquemos de cara a les navidaes al empar que’l númberu nuevu d’Astérix, el 36”, si se cumplen les previsiones de la empresa que tien los derechos a nivel mundial de les histories del galu.

‘El Hobbit’, el 19 de payares

Otra amuesa de l’apuesta seria de Terrier pola llingua asturiana ye la espublización de ‘El Hobbit’, la primer aventura de John Ronald Reuel Tolkien nel universu fantásticu de la Tierra Media creáu pol británicu, n'asturianu. Ésta va tar disponible nes llibreríes el 19 de payares con una tirada asemeyada a ‘Astérix El Galu’ y la idea de la empresa xixonesa ye que repita l’ésitu de ventes de la historia del galu. Nesta ocasión, Terrier ye editora de la obra tres alquirir los derechos n’asturianu del llibru.