Un profesor cuelga videos divertíos con cantares pa neños y neñes en Youtube pa enseñar mirandés

Emílio Martins, un maestru de mirandés, ta acabante d'entamar un proyeutu p’averar esti idioma del tueru asturlleonés a neños y neñes. Ésti lleva’l nome de ‘Mirandês for kids’ y consiste en videos con cantares colgaos en Youtube.
 
La inicitiva, na que'l profesor utiliza un personaxe de nome ‘Eimilho Pica’, ta teniendo una repercusión amplia en Miranda de l Douro, llegando a sumar más de 3.800 reproducciones en dalgún de los sos videos colgaos en Youtube. Éstos busquen, al traviés del humor, el teatru y la música, facilitar el deprendimientu de la llingua del llugar a ñeños y neñes. De momento, hai cuatro episodios de ‘Mirandês for kids’, l’últimu dedicáu a les partes del cuerpu, anque Martins tien na so cuenta de Youtube otros 14 d’humor, toos en mirandés. Sicasí, los más visitaos son los que correspuenden a esta serie didáutica, estrenada’l 3 de xineru cola idea de dir sumando un capítulu nuevu cada selmana.
 
Martins trátase d’una persona mui activa na promoción del idioma, yá que tamién ye promotor d’una banda d’agro-rock de nome Picä Tumilho. La llingua mirandesa, hermana de l’asturiana, ye oficial en Miranda de l Douro xunto col portugués dende l’añu 1999 por decisión de l’Assembleia da República Portuguesa.