‘Quiero ser arcu iris’, historia con munchu color de García López
Pintar-Pintar ta acabante d’espublizar ‘Quiero ser arcu iris’, una historia escrita por María Esther García López y ilustrada por Reyes Fernández Medina. Trátase d’un cuentu en versu sobre Nora, una neña que suaña con volar y camudar de color.
La escritora valdesana torna asina a la lliteratura infantil con un llibru enllenu de “color, mitoloxía, maxa, valores y gran dosis de fantasía”. ‘Quiero ser arcu iris’ cuenta la historia d’un neña que suañaba con volar y poder camudar de color: el verde, el naranxa, el bermeyón… Esto ye, de los colores del arcu iris que sal cuando los rayos de sol trespasen les gotes de lluvia. “¡Qué más da azul o verde/naranxa o bermeyón!/La guapura, los colores/tán dientro del corazón/Los colores, la guapura,/tán n’amistá y nel amor!”, apunta la escritora na obra.
Les ilustraciones de Fernández Medina, enllenes de color, como nun podía ser d’otra forma, completen un rellatu mui prestosu que yá ta disponible nes tiendes pese a que tovía nun se presentó de manera oficial. La intención de García López ye facelo en setiembre, previsiblemente nel Centru Niemeyer. Hai que destacar que’l llibru ye de tapa dura y suma un total de 80 páxines.