Abiertu’l plazu pa la presentación de proyeutos pa l’Axenda Didáctica Escolar d'esti cursu

Mientres esti mes d’ochobre va tar abiertu’l plazu pa presentar proyeutos pa l’Axenda Didáctica Escolar. El cursu pasáu 182 centros de Primaria y de Secundaria y Bachilleratu pudieron disfrutar d’esti programa educativu col asturianu y gallego-asturiano como llingües vehiculares.

Cursos, conciertos, charres, obres de teatru, cuentacuentos… Son munches les actividaes qu’ufre l’Axenda Didáctica Escolar, pa la que yá se pueden presentar proyeutos de cara al cursu 2014-2015. El so oxetivu, “sofitar el llabor docente del profesoráu de Llingua Asturiana/Gallego-asturiano y amosar al alumnáu la rica creación musical, lliteraria o teatral  que s'espresa nestes llingües”. El plazu pa que les empreses privaes d’ámbitu asturianu dedicaes a la producción cultural ufran les sos propuestes –un máximu de cuatro per etapa– pa la sesta edición d’esta iniciativa fina’l 31 d’ochobre.

Tres l’aprobación de los proyeutos, toles actividaes van tar a disposición de los centros pa que faigan una escoyeta de los que más s’adapten a les sos necesidaes y gustos. El cursu pasáu ufiertáronse un total de 63, que se convirtieron en 182 actuaciones y talleres en 137 centros de Primaria y 45 de Secundaria y Bachilleratu.