Noticies

La conocida escritora asturiana Carmen Gómez Ojea acaba asoleyar un nuevu álbum ilustráu n'asturianu baxo'l títulu "Arbolín". El cuentu ye una historia d’amistá ente una neña, Queti, y un árbol, Arbolín, que s'alcuentren nun parque.
Queti camienta que l'árbol pue ser una fada de pelo verde, convertida por un bruxu n’árbol, pese a qu'a lo último, descubrirá la verdá. 
Al textu de Carmen Gómez Ojea, editáu por Pintar-Pintar en castellán y asturianu, acompáñenlu les ilustraciones de Blanca Prendes.

La Editorial Ámbitu acaba facer pública, con motivu de los actos de la XXX Selmana de les Lletres Asturianes, la espublización d'una colección de llibros empobinaos a los neños del primer ciclu de la Educación Infantil (0-3 años).
La presentación tuvo llugar esti martes, a les 19.00 hores, na FNAC de Parque Principáu, y nella participaron Sabel Tuñón, Lourdes Álvarez y Enrique Carballeira; coautores ya ilustrador respectivamente de la serie formada por títulos como "Animalaes", "Los animales", "Animalinos" y "La Primavera".

Acaba nacer una nueva compañía de teatru n'Asturies, lleva'l nome de "Asturmitomanía" y según los sos propios miembros, "pretende espertar l'interés de los neños y non tan neños pola nuestra mitoloxía porque supón una buena forma de descubrir y d'entender la nuestra cultura, al traviés d'interesantes representaciones teatrales que recueyen y recreen, d'una manera lúdica, les raíces mitolóxiques del pasáu xunto con temes d'anguaño".

Con motivu de la celebración de la XXX Selmana de les Lletres Asturianes, qu'esti añu tará dedicada a la escritora ribaseyana Enriqueta González Rubín, la Conseyería d'Educación tien convocáu'l XIV Certame de Poesía y Dibuxu empobináu a los neños y neñes que cursen estudios de Llingua Asturiana nes sos diferentes estayes: Educación Infantil, Primaria, Secundaria y Bachilleratu.
Les bases son les que siguen darréu:
 
PRIMERA.- Pue participar tol alumnáu d’asturianu y de gallego-asturianu dende 4 y 5 años d’Educación Infantil a 2u Cursu de Bachilleratu.