El Muséu del Pueblu d’Asturies acueye los alcuentros de mocedá ‘¡Saca la llingua!’

Alredor de 350 escolinos de Llingua Asturiana d’once institutos xixoneses van participar esti martes nos XII Alcuentros de la Mocedá cola Llingua: ¡Saca la llingua!. El Muséu del Pueblu d’Asturies acueye un añu más esta actividá na que’l nuesu idioma ye protagonista.

Dende les 9.30 hores, y hasta les 13.45 hores, los rapacinos y rapacines van poder disfrutar “d’una xornada lúdico-pedagóxica na que s’intenta averar la llingua asturiana a la mocedá de manera prestosa”, apunten dende la Fundación Municipal de Cultura, Educación y Universidá Popular. Pa ello van entamase xuegos tradicionales como la rana, la llave, el dexabolu, los zancos, los aros, el tiru al palu, la pesca la botella, el tiru cuerda, la peonza, carrera de panoyes o carrera de llecheres, y talleres de fotografía, rap, doblaxe y toponimia, asina como una ‘gymkhana’. Tolos institutos tienen asignaos trés talleres, que van dir faciendo de manera rotativa.

Una de les actividaes más prestoses que se van desendolcar nel Muséu del Pueblu d’Asturies va ser ‘#ElCantarDelVasu’ qu’entamó’l proyeutu Xuncir y que ta teniendo un ésitu mui grande ente los escolinos. Pa finar la xornada, ta prevista una actuación de La Bandina nel tendayu.