Los neños y neñes de Villamayor dieron les sos cartes pa L’Anguleru a un llendador del ríu
Averáse la Navidá y L’Anguleru yá ta navegando hacia Asturies pa pescar angula y convertir los beneficios de les ventes en regalos. Los neños y neñes de Villamayor pudieron entregar esti vienres les sos cartes a un llendador del ríu, collaborador d’esti personaxe navidiegu.
En concretu, acudió a esta cita’l llendador encargáu del ríu Piloña, que foi recibíu polos escolinos del Colexu Públicu Julio Rodríguez Villanueva con toques de xiplu. Estos neños y neñes lleven tiempu trabayando en clase les estraordinaries y enigmátiques carauterístiques biolóxiques de les anguilas y l’estudiu de la cultura de la pesca de ríu n’Asturies, y poco enantes de la llegada del agabitador de L’Anguleru fixeran la representación de la obra de títeres ‘L’Anguleru. Suaños de Navidá’.
Como sorpresa, el llendandor vieno acompañada d’una angulera de Ribeseya, gran amiga de L’Anguleru, y dambos respondieron les duldes de los neños y recordaron la importancia de caltener llimpios los ríos. Tamién comentáron-yos que la Sociedad de Pescadores El Esmerillón convidólos tres les fiestes navidiegues a visitar el centru del ríu Mampodre que trabaya nel repoblamientu de los ríos de las cuenques del Cares, el Seya y la parte alta del Nora, onde conocerán los procesos de frega de les truches y les anguiles, asina como’l programa de llimpieza y cuiráu de los calces que lleven desendolcando dende hai años.
Un viaxe mui llargu
L’Anguleru viaxa nestes momentos a Asturies na so llancha, tres pasar tol añu nel mar de los Sargazos curiando de les anguiles y les angules, pa pescar angula en Nuechebona, vendela, y coles perres que saque, mercar regalos a tolos neños y neñes asturianos, qu’entrega esa mesma nueche. L’Anguleru vien en Navidá porque ye época d’angula y entra n’Asturies pel ríu Nalón, onde los guaḥes de L’Arena salen tolos años a recibilu. Darréu, esti personaxe percuerre tolos llugares d’Asturies onde hai agua en busca d’angula. Si los reis de la casa dexen un gorru de llana en Nuechebona baxo l’árbol de Navidá y dalgo de comer y beber pa que pueda reponer fuercies, a la mañana siguiente van atopar los sos regalos nesi mesmu llugar.