El llibru fai un apueste pola lliteratura oral, sobre manera la que cinca al denomáu "folklor infantil", compuestu por una riestra de refranes, rimes, retafiles, empapiellos, cosadielles y demás pallabres que nos permiten facer de la llingua, nesti casu l'asturiana, un elementu de xuegu.
El llibru, presentáu en tapa dura, forma parte de la coleición qu'Ediciones Trabe entamara con "La Estrellina que subiere al cielu" de Xuan Xosé Sánchez Vicente. Forma parte, poro, d'una de les colecciones más cuiraes tanto nel aspeutu formal como narrativu, que fai por asitiar a la nuestra llingua al altor de les corrientes editoriales que tán funcionando nel restu los territorios.

Los "cinco contos" que nos presenta la escritora García Rivas nesti llibru, busquen facer del neñu o neña llector un cómplice na llectura de los cinco cuentos, pente medies de la música qu'ellos mesmos puen imaxinar pa pone-y soníu y ritmu al testu.
Un conteníu orixinal presentáu amás nuna llingua falta de materiales pa la reciella, y dientro de la coleición Montesín de la editorial Trabe.

La guaxa ye una bruxa permala qu'entra nel cuartu De Roxina, una neña gordina de papos coloraos, cola intención de chupa-y el sangre. ¿Llogrará a lo cabero esta muyerona qu'anda tol día faciendo ferviatos estraños el so oxetivu? Nun vos lo perdáis si queréis pasar un ratu enforma prestosu.

Marta ta mui atristayada porque so ma decidió corta-y les dos coletes. De toles maneres tamién tien una bona noticia: va dir a la peluquería del centru comercial, un sitiu qu'a Marta presta-y enforma. Enantes de cortar el pelo aprovecha pa ver un teatru infantil y, como nun podía ser d'otra manera, escuéyenla de protagonista principal: será la mocina encantexada. Pero ella nun sabe que d'una cueva saldrá un culebrón con mui males intenciones.

El primer tebéu n'asturianu que sigue l'estilu del "manga" nipón. Catuxa, la protagonista de la historia, ye una rapacina de 16 años que regresa nes vacaciones de branu al pueblu a ver a so güela después de 8 años de nun tener contactu con ella. El viaxe va ser daqué iniciático, y nel realcuentru cola güela, la neña va conocer el misteriu de les muyeres de la familia.

Llibru interactivu qu'ayudará a los más pequeñinos a conocer más fonderamente a este misteriosu ya enigmáticu personaxe mitolóxicu asturianu.