La sidra

La sidra ye una bébora alcohólica que s’algama tres la fermentación del zusmiu de la mazana en toneles per unos cuatro meses. Ensin dulda ye la más carauterística d’Asturies, en concreto la sidra natural, un productu únicu nel mundu magar que se consume sidra n’otros munchos llugares.

Nel sieglu I enantes de la nuesa era yá se documenta la esistencia nestes tierres d’una bébora que’l xeógrafu griegu Estrabón noma ‘zythos’. Esiste un alderique ente los espertos sobre si podría referise a la sidra o la cerveza, pero hai motivos de pesu pa pensar que lo que los ástures yá tomaben yera un productu procedente de la mazana.


Cartel del Festival de la Sidra de Nava
¿Sabíes qué…? Esiste dellos tipos de sidra, rescamplando la natural, que ye la que se consume n’Asturies, y axampanao, mayoritaria nel restu del mundu qu’equí suel bebese sobre manera en celebraciones como les fiestes navidiegues.

El procesu d’ellaboración de la sidra natural entama col pañáu de la mazana. Suel facese nel mes d’ochobre, según el grau de maduración del frutu, collecha que ye mayor o menor según la vecería, fenómenu que se da nos pumares pol qu’un se da muncha producción y el siguiente, menos.

Les mazanes trespórtense al llagar, que ye’l llugar onde se fai la sidra. Nun primer momentu llávense con agua a presión, pa pasar llueu pela escoyedora pa quitar les que nun tean les condiciones afayadices, mayense y pasen al llagar, onde se prensen pa sacar el zusmiu, que recibe’l nome de sidra dulce o sidra del duernu.


Sidra D.O.P.
¿Sabíes qué…? L’escanciáu de la sidra nun ye dalgo modernu, sinón que tien poco más de 100 años, cuando la industria empezó a trabayar el vidru. Enantes bebíase en zapicos o xarres.

El líquidu resultante llévase a los toneles, onde entama’l procesu de fermentación. Ésti allárgase hasta marzu, cerca de la fecha de San Xosé, y coincidiendo coles menguantes de xineru y febreru fáense trasiegos, esto ye, entemezse la sidra d’un tonel col d’otros pa uniformizar la sidra, anque nos años últimos ta estilándose otra vuelta’l consumu de sidra sobre la madre, esto ye, ensin trasegar.

Lo último ye corchar la sidra, pa depués facer la distribución a los chigres, onde ésta se consume, yá sía la variedá normal o la Denominación d’Orixe Protexida, fecha con variedaes de mazana namái asturianes. Ye habitual entamar tamién espiches en primavera, col escanciáu de la sidra direutamente del tonel y acompañamientu de comida nuna celebración na que participa un piñu de xente.

  • ¿Por qué ye importante la sidra n’Asturies?
  • ¿Qué ye la DOP Sidra d’Asturies?
  • ¿Pa qué val l’escanciáu?
  • ¿Qué llagares conoces del to conceyu?

 

Enllaza estos tipos de sidra cola so carauterística:

de xelu
 
de nueva espresión
 
natural
 
DOP Sidra de Asturies
 
del duernu
 
axampanao
 
faise con mazana xelaova
nun necesita escanciáu
escánciase
fecha namái con mazana asturiana de variedaes escoyíes
dulce y ensin alcohol
tien gas