La Oficina de Normalización Llingüística de Xixón presentó’l xuegu ‘Que nun te pesquen’
Los alumnos de Llingua Asturiana de terceru de la ESO del IES de Montevil resultaron ganadores del VI Concursu ‘Vas velo, trebeyos pal aula’ col xuegu ‘Que nun te pesquen’. Esti material didáuticu ta dedicáu al mundu de la mar y la pesca.
El concursu, nel que participen mozos y moces de los institutos de Xixón que dan clase de Llingua Asturiana, consiste na preparación de materiales escolares pa trabayar l’idioma nel aula. N’años anteriores les iniciatives ganadores tuvieron dedicaos a temátiques como l’Antroxu o la comida, pero nesta ocasión un xuegu dedicáu al mundu de la pesca y de la mar llevóse’l premiu, consistente na edición del material y un viaxe d’intercambiu cultural a Miranda de l Douro.
‘Que nun te pesquen’ trátase d’un xuegu que toma coses de la Oca y del Trivial y que recueye refranes, pallabreru de la mar, puertos d’Asturies o poemes, ente otres coses. La so autoría cuerre a cargu d’Ana María Fanjul, Patricia García Fernández, Sonia María García García, Jhonatan García Peláez, Rui Pinto, Daniel Manzano, Almudena Martínez Rúa, Christian Morán y David Soto, escolinos que contaron cola collaboración de la profesora Sonia Mora. Almudena y Jhonatan encargáronse d’esplicar a los presentes el funcionamientu del xuegu, que cuenta con un tableru. Según la casiella na que se caiga al llanzar un dadu, hai que facer una serie de pruebes. Asina, nel anzuelu, hai que responder a un frase fecha; nel pexe mariellu, completar un refrán marineru; nel pexe platiáu, superar una cuestión de vocabulariu; y, na interrogación, retrucar una entruga. Por últimu, tamién ye posible caer nel faru, una casiella de descansu, nel que’l xugador ha de lleer un poema sobre la mar.
“El xuráu valoró positivamente la presentación mui ellaborada y orixinal del trabayu, los temes variaos de los conteníos y centros d’interés que planteguen”, amás de destacar que’l xuegu “ye mui entreteníu y didáuticu, colo que pue ser una bona ferramienta pa les clases de los caberos cursos de Primaria, pa la ESO y pal Bachiller, al tiempu qu’ufierta la posibilidá de trabayar el pallabreru de la mar y los pexes, los refranes y frases feches, y plantega cuestiones que posibiliten el conocimientu del patrimoniu cultural asturianu, sobre manera no que tien que ver colos vezos, tradiciones y costumes marineres, y colos conceyos marineros d’Asturies”, espliquen dende la Oficina de Normalización Llinguística. La so responsable, María Xosé Rodríguez, encargóse de presentar ‘Que nun te pesquen’ xunto con María Álvarez, xefa de división de Cultura de la Fundación Muncipal d’Educación, Cultura y Universidá Popular. Rodríguez emponderó’l trabayu desendolcáu polos escolinos y señaló que’l material yá ta disponible en tolos centros escolares del conceyu.
El llabor d’un trimestre
Los mozos y moces del IES Montevil dedicaron un trimestre enteru al desarrollu de ‘Que nun te pesquen’ y la busca de conteníos, “llabor que nos llevó más tiempu”, esplicó Rui, qu’añadió que lo más complicao foi dar “con frases y refranes”. Internet y la biblioteca foron los llugares d’ú sacaron tola información, orientaos pola so maestra, Mora, arguyosa del trabayu desendolcáu pa los sos alumnos y alumnes, qu’agora cursen cuartu de la ESO. Como premiu a tan grande esfuerciu, los de Montevil viaxaron en mayu a Miranda de l Douro, territoriu portugués onde’l mirandés, una variante del asturlleonés, ye oficial. Abellugaos nun albergue en Barrocal, tuvieron la ocasión de facer actividaes d’ociu y culturales mientres cuatro díes, amás de conocer a mozos de la so edá que dan clases de mirandés. Ana destacó la perbona esperiencia que vivió en Portugal, mientres que los sos compañeros nun dexaron de contar anéudotes, con dalguna cayida protagonizada por una de les viaxeres incluyida.
Na semeya, Mora y Rodríguez suxeten el tableru del xuegu arrodiaes de los alumnos y alumnes ganadores del concursu.