L’Asociación Cultural Garabuxada homenaxó a los embaxadores de L’Anguleru

L’Acuariu de Xixón acoyó esti domingu una gala pa homenaxar a los embaxadores de L’Anguleru. D’esta forma, l’Asociación Cultural Garabuxada pretende reconocer el llabor de difusión de la figura d’esti personaxe navidiegu.

Los centros a los que L’Anguleru decidió da-yos el calter d’embaxadores nel 2015 pol so trabayu nesta Navidá pasada son los colexos públicos Pedro Penzol (Veiga), Pablo Miaja (Uviéu), Alfonso Camín (Xixón), Julio Rodríguez Villanueva (Villamayor), Santa Eulalia (Uxo), Xovellanos (Panes), Montevil (Xixón), El Coto (L’Entregu), Tremañes (Xixón), El Pascón (Tinéu) y Ventura de la Paz Suárez (L’Arena); los colexos d’Eduación Infantil y Primaria Maestro José Luis García Rodríguez (Castrillón) y Padre Galo (Ḷḷuarca); el Centru Rural Agrupáu Altu Ayer (Santibanes); y la Escuela d’Eduación Infantil El Carbayo (Castrillón). Otra manera, l’asociación de L’Arena nomó embaxadores al grupu Felpeyu; los profesores Víctor Raúl Pintado ‘Vitu’, Reyes Duarte, María Díez Viñuela, Geli Rojo y Tamara Sáez; les escritores Paloma González y Carmen Fernández; el dibuxante Christian Bartsch; y a l’AMPA del Colexu Públicu Xovellanos de Panes.

Na gala tamién s’entregaron los premios a los meyores dibuxos de L’Anguleru, que correspondíen nun llibru de L’Anguleru editáu por Trabe, una garulla y una entrada pal Acuariu pal ganador, y la garulla y la entrada pal segundu y terceru. En categoría infantil el vencedor foi l’uviedín Julio Nieto, mentes que nel primer ciclu de Primaria ganó’l castrillonense Adrián Fernández López  y, nel segundu, el mierense Sergio Donaire.