Jose Manuel Fuente 'El Tarangu'
L’afición al ciclismu siempre foi mui grande n’Asturies. Les nueses carreteres acoyeron dende siempre grandes etapes, sobre manera de monte por mor la orografía del nuesu territoriu, y foron munchos los ciclistes asturianos que fixeron grandes xestes nes grandes carreres d’esti deporte.
Ún de los meyores, y el qu’ensin dulda fixo crecer el siguimientu al ciclismu n’Asturies, foi ‘El Tarangu’. El so nome real foi José Manuel Fuente Lavandera y naciera en Llimanes nel añu 1945, siendo ciclista profesional dende’l 1970 al 1976 nos equipos Karpy, l’históricu KAS y Bianchi.
Jose Manuel Fuente cola maglia rosa del Giro d'tialia.
La primer gran vuelta na que participó El Tarangu foi La Vuelta, nel 1970, finando como primer clasificáu neoprofesional, mesmo añu nel que ganó la clasificación por puntos de la Vuelta a Asturies y una etapa de la Volta a Catalunya. El sierense llegaba asina al profesionalismu con 25 años depués de destacar como aficionáu nos años previos, sobre manera l’anterior, una edá un tanto tardía nel mundu del ciclismu.
El so bon facer nel Karpy llevó al KAS n’interesase nel asturianu y nel 1971 pasó a formar parte d’esti potente equipu, onde tuvo los sos mayores ésitos. Sicasí, los sos comienzos nun foron escesivamente bonos, con una mala participación en La Vuelta –naquel tiempu la carrera española celebrábase ente abril y mayo, siendo la primera de les trés grandes n’echar a andar– que salvó nel Giro d’Italia –al qu’acudió pola baxa d’última hora d’un compañeru– col maillot del monte y llueu nel Tour de Francia con dos victories d’etapa consecutives nos Pirineos.
'Ciclo de dolor', llibru biográficu editáu en 1977 sobre Fuente.
Al añu siguiente, nel 1972, ganó una etapa y la xeneral de La Vuelta y foi líder del monte a pesar de nun ser xefe d’equipu; repitió como primeru de la clasificación de monte nel Giro, nel que finó segundu namái superáu por Eddy Merckx y ganó otra etapa. El Tour sería’l so oxetivu principal la campaña siguiente, polo qu’arrenunció a la Vuelta, corrió’l Giro (campeón del monte y una etapa) y dio espectáculu na carrera francesa, onde finó terceru depués d’atacar ensin descansu al líder y vencedor Luis Ocaña, llevando tamién el maillot de los escaladores.
Nel 1974 céntrase na Vuelta y nel Giro, con victoria na primera y dos etapes –una nel Naranco–, y cinco y el maillot de monte na segunda, na que namái un mal día impidió-y ganar la xeneral, que llevó finalmente Merckx. Sería’l so momentu más espectacular, pero tamién l’últimu, yá qu’al añu siguiente nun amosó’l nivel y llueu una enfermedá impidió-y competir a altu nivel, obligándolu a retirase nel 1976.
- ¿Cuántes grandes vueltes ganó El Tarangu?
- ¿En qué terrén destacó esti ciclista?
- ¿Cuáles foron los so rivales principales?
- Cita otros ciclistes profesionales asturianos que conozas.