Escenines pa la Reciella programa trés obres de teatru pa esta Navidá

Avérase la Navidá y, con ella, les ganes de volver a disfrutar d’Escenines pa la Reciella, el festival d’artes escéniques que ‘Reciella. Families pol Asturianu’ entama por estes feches pa ufrir teatru n’asturianu a les neñes y neños asturianos. Esta edición va contar con trés obres que se van representar en Xixón ente los díes 27 y 29.

Foi nel 2013 cuando esti coleutivu arrancó con esta iniciativa qu’añu tres añu algama ésitu, como amuesen los aforos completos en toles sos actividaes o que l'añu pasáu, con restricciones pola COVID-19, escosárense toles entraes en menos de 48 hores. Esta edición caltién el patiu del Centru de Cultura Antiguu Institutu como sede de les funciones, siempre a les 19 hores, con entrada llibre hasta completar places.

La primera de les trés obres en representase va ser el martes 27 ‘El viaxe de Covaletti’, d’Higiénico Papel Teatro, una producción que mereció nel 2020 el Premiu Nel Amaro de Teatru Profesional en Llingua Asturiana y Gallego-asturiano. Al día siguiente va ser el turnu de Saltantes Teatro, que va poner n’escena ‘El gorrumbu’ –estrena n'asturianu–, encamentada pa mayores de 6 años, mentes que va pesllar esta edición el xueves 29 Carlos Alba colos títeres ‘El trasgu y el molineru’.

El diseñu del cartelu d'esta edición d'Escenines pa la Reciella torna a ser obra de David G. Ferrero y nél rescampla la mascota del festival, una mustadiella que nesta ocasión apaez llevando una maleta.