El ciclu ‘Escenines pa la Reciella’ lleva música y teatru n’asturianu esta Navidá a neños y neñes

Esti vienres va celebrase la primer de les cuatro sesiones del ciclu ‘Escenines pa la Reciella’ qu’entama ‘Reciella.Families pol Asturianu’. Esti coleutivu va averar l’asturianu a los más pequeños esta Navidá al traviés de la música y el teatru.

Esti vienres va celebrase la primer de les cuatro sesiones de ‘Escenines pa la Reciella’ qu’entama ‘La ópera infantil ‘Los amorinos de Bastián y Bastiana’, de Nun Tris, va inaugurar el ciclu esta tarde, a les 18 hores, nel salón d’actos del Colexu Públicu Xovellanos, mesmu llugar que va acoyer mañana, tamién a les seis de la tarde, ‘De rosines’. Esta obra de teatru de la Compañía Olga Cuervu axunta esti xéneru cola música y los cantares. La mitoloxía asturiana, como nun podía ser d’otra manera, va tener güecu en ‘Escenines pa la Reciella’ gracies a Carlos Alba ‘Cellero’, que va presentar el so espectáculu ‘Mitoloxíes’, nel qu’incorpora títeres pa contar cuentos divertíos y interesantes. Esta representación va tener llugar el vienres próximo, tamién a les 18 hores na escuela xixonesa, y, al igual que les anteriores, va ser de baldre.

L’actividá que va poner el ramu a esti ciclu ye l’esperáu conciertu de presentación ‘Pop Piquiñín’, el discu n’asturianu de Petit Pop editáu por Araz que ta causando sensación ente les neños y neños asturianos. Esta actuación especial, prevista pal sábadu 28 a les 18 hores, va treslladase al Teatru Xovellanos y va contar cola presencia d’invitaos y collaboraciones. El preciu de les entraes ye 6 y 3 euros p’adultos y pequeños, de manera respeutiva.