Cellero lleva al teatru de marionetes la versión asturiana del cuentu ‘Xuan Soldáu’

El Teatru Prendes de Candás va ser sede esti sábadu de la estrena de la obra ‘Xuan Soldáu’, que protagoniza Carlos Alba ‘Cellero’. L’actor y monologuista estrénase nel teatru de marionetes nesta fábula familiar xunto colos espertos búlgaros nesti arte Olga Zeceva Cúrcic y Alexander Cúrcic.

‘Xuan Soldáu’ trátase d’una adaptación del cuentu de los Hermanos Grimm conocíu como ‘Xuan ensin mieu’ recopiláu nel llibru ‘Cuentos y poesías populares andaluces’ (1859) por Fernán Caballero –nomatu utilizáu pola escritora Cecilia Böhl de Faber– como ‘Juan Soldado’.  Esta historia fíxola más conocida entovía Fernán Gómez cola película pa televisión del mesmu nome protagonizada por él mesmu y estrenada nel añu 1974, onde fai una revisión del orixinal na que “reinterpreta dellos símbolos relixosos de la versión de Caballero col envís de rellacionar cola realidá social daquella: el viniente esbarrumbe de la dictadura del xeneral Franco”, esplica Cellero, que se basa nesta versión pa ‘Xuan Soldáu’. Asina, l’asturianu fai que pela “socesión de peripecies de calter maravilloso que-y pasen al personaxe, s’amuese una crítica a la situación social d ‘agora: la división de la sociedá ente una mayoría que trabaya y una minoría invisible que ta p’aprovechase de la mayoría”.

Los asistentes al espectáculu van ver sobre l’escenariu una puerta “que separta al públicu y actor, per una banda, d’una minoría invisible y pudiente, pela otra”, amestando’l trabayu d’actor col teatru de marionetes. Esta ‘Puerta de la Bona Vida’ ye u llega Xuan tres toda una vida trabayando. Mientres espera a qu’ésta s’abra, cuenta al públicu los detalles d’esa vida, “enllena aventures y socedíos maravillosos: alcuentros con magos, con bisarmes y mesmo con diaños”. Unes histories de les que siempre sal bien por cuenta de nun tener mieu a nada y a confiar n’él, “que son los valores que la obra fai tresmitir a la reciella”, esplica Cellero. “¿Va consiguir Xuan Soldáu pasar la Puerta que ta separtando a una minoría de la mayoría del pueblu? El final, ablucante, supón un cantu a la esperanza y al enfotu creador de la infancia”, añade l’actor, qu’apunta que la historia de ‘Xuan Soldáu’ ta enfocada pa neños y neñes, pero que tamién tien chisgos p’adultos pola so denuncia social.

Nel desendolcu de la obra ye fundamental el papel de los espertos nel teatru de marionetes Olga Zeceva, encargada de la escenografía, y Alexander, responsable de la direición escénica, que bebe de la escuela búlgara del xéneru, “onde la idea y l‘argumentu trescurren al través de l’aición de los personaxes, en resultancia del trabayu enriba l’escenariu del actor y direutor”, esplica’l propiu Alexander.

Los escolinos, primeros en disfrutala

Pese a que la estrena oficial de ‘Xuan Soldáu’ va ser el sábadu a les 20 hores, con entrada de 6 euros, un grupu d’alumnos va poder disfrutala previamente nel mesmu escenariu. Ello débese a qu’esta obra va inaugurar la XIX Campaña de Teatru pa Escolinos d’esti cursu’l xueves.

Na semeya, la Puerta de la Bona Vida.