Castros d'Asturies

Asturies ye ún de los territorios de cultura castreña. Tolos pueblos prerromanos asitiaos no qu'anguaño ye Asturies, esto ye: galaicos, ástures y cántabros, llevantaron castros de los qu’entovía atopamos exemplos bien conservaos.

Les diferentes tribus qu’habitaben estes tierres, coles sos diferencies, amosaron delles carauterístiques constructives comunes. Tamién coincidíen nos allugamientos escoyíos pa estos asentamientos, zones altes y con una bona visibilidá de la so redolada.


Castru de Cuaña
¿Sabíes qué…? Los historiadores y arqueólogos usen el términu cultura castreña al periodu que va dende la Edad de Bronce hasta la conquista romana.

Si tenemos como referencia la so situación, podemos dividir los castros asturianos en trés tipos. Esto ye, d’interior, los más numberosos, asitiaos nuna llomba de pocu altor; de monte, na parte alta d’un picu; y los de mariña, qu’aprovechen el mar pa la so defensa.

Consistíen nun pobláu fortificáu que disponíen de fosu y muries pa evitar los ataques d’otros pueblos, que ye lo que meyor llegó conserváu al nuesu tiempu. Los habitantes de los castros vivíen d’esplotar los recursos naturales disponibles na so redolada, como l’agricultura y la caza, vivíen en cabañes de planta circular y trabayaben tamién l’alfarería y la metalurxa.


Castru de Taramundi
¿Sabíes qué…? N’Asturies hai llocalizaos más de 200 castros.

Cola invasión romana de los territorios de los ástures ente los años 29 y 19 entantes de la nuesa era, los castros siguieron emplegándose, como amuesen la presencia de restos y estancies romanes nellos. Sicasí, poco a poco foron abandónandose al dir evolucionando a otru modelos poblacionales.

Los castros meyor conservaos que llegaron a los nuesos tiempos son el de Cuaña y el de Chao Samartín. Otros allugamientos que nun pues dexar de visitar son la Campa Torres, Pendia, San Ḷḷuis, Mouguías y Taramundi.

  • ¿Quiénes vivíen nos castros?
  • ¿Ónde taben asitiaos?
  • ¿Qué pasó con ellos cola conquista romana?
  • ¿Cuál ye’l castru que ta más cerca del to llar?

 

Enllaza estos castros colos conceyos onde tán asitiaos:

San Ḷḷuis
 
Campa Torres
 
El Castrillón
 
Mouguías
 
Chao Samartín
 
Pendia
 
Ayande
Xixón
Llaviana
Cuaña
Grandas de Salime
Bual