L’actividá ‘Menudu traxín’ va averar el baille y el traxe tradicional asturianu a neños y neñes

Vezos Astures y ‘Reciella. Families pol Asturianu’ entamen esti Xueves Santu l’actividá ‘Menudu traxín’, que naz cola vocación de tener una continuidá añal. Va celebrase nel patiu del xixonés Colexu Públicu Xovellanos y busca averar el baille y el traxe tradicional a neños y neñes.

Dende les 10.30 hasta les 14 hores va haber espaciu pa talleres, xuegos y actividaes pa deprender a baillar y pa conocer el traxe del país, “too ello col oxetivu de pasar una xornada prestosa na que la reciella que tea familiarizao col baille y el traxe atope un entornu afayadizu pa rellacionase con xente de la so edá, y pa que lo que nun lo tea pueda averase y aficionase de forma lúdica a la nuestra tradición. Y amás col asturianu como llingua vehicular de les actividaes”, apunten dende la organización, que cuenta col sofitu de la Oficina de Normalización Llingüística de Xixón. Toles neñes y neños, asina como les sos families, tán convidaos a acudir mañana al Xovellanos, yá sía con traxe o ensin él, sepan o non baillar o dominar l’asturianu.

Nun primer momentu, van celebrase xuegos tradicionales y talleres de coloriar, y los pequeños van disponer d’un espaciu pa fotografiase. A les 12 hores ta previsto l’aniciu del taller de baille y, pa les 13 hores, un pasucais. L’actividá ye de baldre, anque pa la so participación los neños y neñes han de tar acompañaos por un adultu.