Ye tiempu de faer Compromisu por Asturies

Carlos X. Blanco's picture

Testu firmáu por Carlos X. Blanco y Ricardo Candás.
 
Les dos persones que roblamos esti escritu llevamos naguando por una opción política unitaria que represente dafechu a la nación asturiana. Dende les posibilidaes qu´ufre internet, y col preste de delles publicaciones web, yá llevamos bien de tiempu defendiendo la necesidá d´acabar cola sopa de sigles que se reclama del nacionalismu, l´asturianismu, el soberanismu, etc. Dengún d´esos cartelos de presentación, dengún “-ismu” ye inocente, llibre de conteníu ideolóxicu. Pero cola situación tan llaceriosa que vive Asturies, siempres pensemos que los alderiques fuertemente ideoloxizaos yeren poco granibles y que nun daba más la etiqueta y que sí importaba, riba too, algamar unión de fuerces, converxencia de voluntaes, xuntanza de manes pa trabayar pol país, entendiendo por Asturies una entidá nacional con rasgos culturales y llingüísticos, pero amás, con historia política perantigua y soberana, y unos problemes socioeconómicos específicos. Por eso los dos, Ricardo y Carlos, los qu´agora roblamos, y dalgunos más, entamemos una web, ‘Pola Xuntanza’, que toos recordaréis y que, con erros y torpeces, por supuesto, pero tamién con bonal voluntá ente munchos escayos, torgues ayenes y ataques varios, punxo sobre la mesa, xunto a la dinámica de dellos partíos que tamién taben polo mesmo, una necesidá de xuntanza de fuerces polítiques asturianes lo más amplia posible. Al entamu la xuntanza llendábase al nacionalismu asturianu d´izquierda y darréu abrióse más la mano –col intentu de facer un frente mayor porque l’enemigu nun yera pequenu– pa convidar a toos a esi proyectu de tener un espaciu políticu dafechamente asturianu, comprometíu col país, útil a la sociedá asturiana y verdadera punta de llanza, mañana otru día, contra´l Réxime clientelista y colonial que mos aforfuga. Güei vemos que solo hubo voluntá y posibilidá xuntacista a la izquierda –de lo que mos allegramos por ser dafechu afín a la nuestra conciencia política–.
 
Agora, acabante de finar el Congresu Fundacional de ‘Compromisu por Asturies’, en xunu del 2012, podemos decir qu´aquello polo que lluchábemos nun entamu yá s´algamó. Tol nacionalismu asturianu d´izquierda, en xunto delles sensibilidaes del ecoloxismu y de la sociedá más crítica y lluchadora d´Asturies, tán yá xuntos nesta federación de partíos y d´independientes. Habéis d´entendenos bien. Esti Congresu nun se dio de forma tan granible gracies a nós, taría bono. Eso diba ser una babayada valera y totalmente inesauta. Falamos namái –humildemente– del cumplimientu d´un sueñu nuestru, el de Ricardo Candás y de Carlos X. Blanco, el sueñu de la realización d´un proyeutu qu´entendíemos necesariu. Tamién ha d´entendese nidiamente qu´esti Congresu del 23 de xunu del 2012 ye namás qu´un entamu, un renacer. Queda too por andar. Ablayaos polos resultaos y la falta de dinámica del nacionalismu asturianu, lleguemos a creer –hasta va pocu– que taba too perdío, que nada más podíamos facer nesti sen. Dalgunu de nós decretó “la muerte del nacionalismu asturianu”. Pero esta Ave Fénix nun muerre tan a lo xole. Ye testerona, ye lluchadora masque pequena, ye un fechu tapecíu pero real y oxetivu na sociedá asturiana. Hai base social pal nacionalismu: pequena, confundida, sicasí con complexos, pero haila. Podemos esporpollar. Podemos canalizar un descontentu, sobre manera si les condiciones, dures, perdures, del capitalismu xabaz y de los gobiernos españoles nos afueguen entá más. Hasta agora’l sinu de los asturianos foi esconsoñar de llargos sueños cuando la esclavitú se mos presentaba a la vuelta la esquina. Agora esa velea de convertinos una colonia tovía más insignificante, muerta no demográfico, llaboral y económico, va llegar. Y tenemos que tar ehí: los nacionalistes asturianos de la izquierda tenemos que tar colos mineros, colos interinos, colos esplotaos, colos defensores de la llingua y del mediu ambiente, colos mozos, colos paraos y colos que yá tán naciendo esti añu paraos y endeldaos, ensin futuru. Nós, la izquierda d’Asturies, tenemos que ser la verdadera “indignación” n´Asturies; nós tenemos que ser el chispu qu´encese tola dinamita del descontentu, del fracasu del modelu económicu y políticu qu´España y les sucursales nos aperiaron pal país. Tenemos que ser la voz que diga “abasta yá”. Va ser cuestión de dignidá, d´autodefensa, de resistencia y de sobrevivencia.
 
Nós escribimos esti pequenu testu p´amosar el nuestru sofitu a ‘Compromisu por Asturies’, la única vía posible pa trabayar dende los conceyos, cerca del pueblu y de los sos problemes, sofitándolu nes sos necesidaes y lluches, adelantrándonos a la so voz y a los sos españíos de rabia y desesperu. Somos un país con llingua, historia soberana y xente trabayador y honesto. Vamos demostralo. ¿Cómo? Dándonos a conocer conceyu a conceyu, barriu a barriu, aldega por aldega. Vamos demostralo colos fechos: tando al serviciu del pueblu asturianu, llevantando siempre´l puñu énte´l que lu afuega. Yá hai una xuntanza. Yá hubo un calce de participación cien por cien democráticu, onde tol mundu, afiliáu o non a los partíos entamadores, pudieron espresase. Yá hai un garrapiellu de persones dimpuestes a trabayar en dellos conceyos. La democracia participativa nun mos la van regalar. Tenémosla que construyir toos y dexar atrás les zunes y griesques estériles del pasáu. D´esi piñu que yá formamos va dase un centru gravedá d´onde tienen qu´orbitar tola Asturies non alienada. Encamentamos a axuntase a esti proyeutu tou aquel que se sienta asturianu y d’izquierdes.
 
Ye tiempu de faer un Compromisu por Asturies.
 
Carlos X. Blanco y Ricardo Candás son profesores de Filosofía.

Contador Estadistiques