UNA énte les eleiciones del 20-P, un apueste pol futuru.

Munchos y munches de los nuestros votantes tán estos díes entrugándonos cuála va ser la nuestra postura de cara a les eleiciones del 20-P. Tanto Unidá Nacionalista Asturiana (UNA), federación a la que pertenezo, como Bloque por Asturies, tuviemos los nuestros debates internos sobre l’asuntu y yá tenemos clara la nuestra posición.
 
Nesta tribuna voi facer por resumir les argumentaciones mayoritaries dientro d’UNA, y que naturalmente comparto. Razones pa presentase o non hai munches y bones, pero la valoración conxunta del momentu , les condiciones y les prioridaes fexo que la organización tomara la decisión de nun presentase a esta convocatoria electoral.
 
Lo primero que tenemos que facer pa tomar decisiones ye axustanos al principiu de realidá y ser conscientes de que son unes eleiciones nes que ye imposible algamar representación y los nuesos votantes, simpatizantes y militantes persábenlo. Per un llau faen falta más de 50.000 votos n’Asturies p’algamar un diputáu nel Congresu, ente otres coses porque la llei eleutoral ta fecha pa favorecer principalmente al PSOE y PP y nun dexar espaciu pa les minoríes, y per otru llau a la polarización que siempre existe nes elecciones d’esti tipu, precisamente pola falta d’opciones p’alternatives más pequeñes, va ser nesti casu más grande pola sensación de cambiu de ciclu ente PSOE y PP na política estatal. De fechu, el requisitu nuevu de recoyida d’avalistes ente los electores, ye una torga nueva que non solo nun abre’l sistema sinón que lu zarra inda más.
 
Pero penriba de la valoración de les condiciones esternes o impuestes, creo que se fexo una fonda reflexón sobre cuala ye la nuestra responsabilidá y xera principal nesti momentu na construcción del Espaciu Políticu Asturianu del que venimos falando dende va tiempu. Unidá Nacionalista Asturiana (UNA) ta nesti momentu abriendo un procesu de confluencia y construcción col Bloque y otros colectivos y persones que pa nosotros ye estratéxicu y prioritariu, un procesu que requier unos mínimos de tiempu p’atropar y cuayar.
 
La primer espresión d’esi procesu necesariu y que demanda muncha xente viose na coalición col Bloque por Asturies en el 22-M, pero en nengún casu taba pensada en términos eleutorales, sinon de construcción d’una alternativa afitada, que seya a presentase a les elecciones nes meyores condiciones depués d’un trabayu común y continuáu, polo que tien el so horizonte electoral próximu nes elecciones asturianes y a conceyos.
 
Eso foi lo que prometimos y pensamos que les y los votantes de la coalición valoraron enforma esi plantegamientu de construción d’una propuesta política seria, madura y con vocación de permanencia nel tiempu, polo que la nuestra prioridá ye cumplir con esa promesa que ficimos na campaña electoral.
 
Polo tanto nun podemos cayer, como yá se fixo nel pasáu, en prieses que nos aparten del camín que toca percorrer agora y que pongan torgues y nos metan en debates que faigan enfriar el procesu entamáu por una supuesta urxencia eleutoral cuando, como dixi más arriba, ye imposible algamar representación. Tampoco podemos abrir dinámiques que creen confusión o manden mensaxes contradictorios a la militancia y los votantes, que son xente maduro pa entender que con estes eleiciones del 20-P una alternativa en procesu de construcción como la nuesa tien poco que ganar y muncho que perder.
 
Somos conscientes de que tamién existen argumentos de pesu a favor de concurrir a la convocatoria, pero una valoración conxunta de los pros y contres llevanos a la conclusión final de que les ventayes en nengún casu superen a los inconvenientes.
 
Tanto UNA como Bloque tenemos claru’l compromisu de confluencia y la prioridá del trabayu na alternativa que nos permita llegar nel meyor momentu posible y con posibilidaes d’algamar representación a les próximes cites electorales, y eso, que ye un Compromisu con Asturies, robláu primero del 22-M ye no que vamos centrar tolos esfuerzos.
 
Dende UNA pensamos polo tanto que nun hai que presentar candidatures, y que nun facelo ye un síntoma de madurez y de responsabilidá. Munches formaciones con gran apoyu social y eleutoral, en contestos mui distintos y por razones mui diferentes, yá tomaron decisiones asemeyaes con total normalidá. Pero que nun presentemos llistes nun quier dicir que nun tengamos nada que dicir nin propuestes alternatives y pensamos que ye importante facer una campaña activa explicando esta postura y dando alternatives al votu a les formaciones tradicionales, al empar que siguimos trabayando con puxu no importante, l’alternativa política y social qu’axunte a la izquierda nacionalista y al asturianismu progresista, nel camín qu’UNA y Bloque abrimos el 22-M y que tien d’espoxigar pa que seyamos a algamar la mayor representación posible nes próximes eleiciones.