Sobre les eleiciones estatales del 20 de payares

Mariu Arbesú's picture

L’alderique sobre si presentase o non a les eleiciones estatales del 20-P encarióse selemente na esquierda soberanista col resultáu de qu’Andecha Astur participará nes eleiciones mentantu Conceyu Abiertu centrará el so esfuerzu en siguir organizándose como referente nos conceyos pa la xunidá d’aición dende la bas. Per otru llau, les organizaciones polítiques asturianistes (PAS-URAS y Bloque por Asturies-UNA) nun se van presentar a les eleiciones del 20-P baxo denguna fórmula.
 
Cá organización llexítimamente fae los sos analís y toma les sos decisiones, asina que namai voi atreveme a opinar sobre lo qu'afeuta a Conceyu Abiertu y Andecha Astur asperando qu’aide esto a esclariar dubies de per áu camina’l nuesu movimientu políticu. Anque daquién que lo vea dende fora podría pensar en táutiques contradictories, nun ye asina, pues dientru d’un mesmu movimientu políticu ye normal dafechu qu’esistan dixebraes organizaciones seutoriales que se compenetren xugando distintos roles.
 
Cualaquier decisión sobre estes eleiciones pal nuesu movimientu nun momentu como ésti de relevu xeneracional y de cambeos estructurales yera difícil. Hai que reconocer qu’el endurecimientu de la llei eleutoral qu’impuso a los minoritarios la torga de tener que pañar firmes pa poder presentase foi nel casu de nueso un elementu motivador, yá que sentímonos na obligación moral de recoyeles p’amosar que tenemos organización, amás de que naguábemos por presentar tola documentación dafechu n’asturianu.
 
D’otra manera, y esto sí que lo tuvimos mui en cuenta, persabemos que la mocedá asturiano d’angüañu cá vuelta cree menos nes escases formes de participación política que permite l’estáu español. Mui poca mocedá cree en verdá qu’al travies de la militancia en partíos políticos o sindicatos y de la participación activa o pasiva en procesos elleutorales puean algamase cambeos políticos o sociales reales. Mui poca xente mozo, a la fin, cree qu'el votu sirva pa dalgo. Per otru llau, munchos ciudadanos y munches ciudadanes que s’asitien n’otru corte xeneracional, y non necesariamente conservadores, sí creen qu’el votu pué ser una forma útil d’algamar cambeos políticos o sociales. De fechu nuna sociedá tan avieyao como l’asturiana a la mayoría les persones toco-yos vivir n'otra dómina na que nun esistía’l drechu’l sufraxu y asina ye qu’angüaño munchos ciudadanos y ciudadanes, aún con sentíu percríticu, siguen valorando’l drechu a votar como un llogru mui importante y el so usu como una aición de responsabilidá.
 
Atopámonos entós énte la situación de qu’una parte de la ciudadanía asturiana crítica va dir a votar y otra parte non. Esta sana contradicción atopámosla tamién dientru les organizaciones de la esquierda soberanista onde la mocedá ye un actor mui importante. En cualaquier casu pienso que nós tamos sabiendo iguala : el nuesu campu prioritariu de trabayu siguen siendo los conceyos asturianos y unes elleiciones como éstes nun mos van distraer d’esi llabor. La esperiencia de Conceyu Abiertu ta siendo perpositiva, y l’oxetivu prioritariu nel que tenemos que volcanos dalgunos ye siguir afondando nesa esperiencia y en xenerar dinámiques de trabayu políticu xunitariu dende la esquierda soberanista a nivel de los conceyos. En coherencia con esto ye un aciertu tamién que nes candidatures tengan más pesu militantes hestóricos y, por embargu, otros más mozos ocupen puestos secundarios.
 
Préstame enforma que los asturianos y asturianes que vaigamos votar el 20-P dimpuestos a escoyer una alternativa asturiana y d’izquierda podamos facelo votando a Andecha Astur.
 
 

Comentarios

Anda, Mariu, que coles dosis de realismu que tenéis y la gran autocrítica que ficístis en mayu, ye como pa tomate en serio. Sois cuatro con cuarenta blogs, faciendo ruiu. Yá táis en plan friqui.

Contador Estadistiques