Retruque y comentarios a la entrevista fecha a Menéndez Blanco (romanarmy.eu)

Carlos Sala (Neville)'s picture

Quiero en primer llugar saludar a la noble tribuna Asturies.com y a los sos llectores nesta la mio primer intervención deseyando llarga vida al portal mediático y anováu lloreos.

Entremos yá na materia otorgando al señor Menéndez Blanco la dulda del desconocimientu pa nun tener que encasillalu yá ensin mas preámbulu nes nutríes files de paracaidistes venceyaos d'una o otra forma a la Universidá Autónoma de Madrid.

Paez que desconoz esti señor que les cróniques llatines reflexaron una realidá ensin inventar cuála yera la belicosidá de cántabros y ástures y l'importancia de les Guerres Cántabres o Ástur-Cántabres como agora gusten de nomar.

Foi la señora Fdez Ochoa xamuscada nestos momentos -na so carrera científica naturalmente- y obligada a dexar el testigu al señor Villa na so "revolución romanista" la que sacó ún de los sos famosos coneyos de la chistera pa dicir que les Guerres Cántabres en realidá nun fueren mas qu'una operación propagandística y llaudatoria pa realzar la figura del emperador Octaviano.

Pa la so desgracia Y. Peralta Llabrador y otros especialistes soterraron les sos alucinaes intuiciones y refrendaron a los clásicos.
L'arqueólogu cántabru apocayá amosónos dos escenarios bélicos distintos y consecutivos nel marcu de les Guerres Cántabres per una parte l'asaltu a los grandes oppidums de la meseta, de siguío desenvolveríase na zona trasmontana una guerra irregular de guerrilles onde los asedios nun tendríen tanta importancia anque nun dexaríen de producise como ta constatao na Espina del Gallego.

Llegaos a esti puntu hai que señalar que les intervenciones arqueolóxiques na vecina Cantabria lleven años d'adelantu y que pela cueta na vecina provincia de Llión les investigaciónes arqueolóxiques tán entá más retrasaes que n'Asturies.

El mesmu Peralta Llabrador asitia los episodios del Medullio nel occidente cántabrou o nel oriente asturianu y tamos falando de quien por méritu propiu ostenta nestos momentos el mayor grau d'autoridá y llexitimación.

Tamién en mas d'una ocasión orientó sobre la necesidá d'efectuar investigaciones nel oriente asturianu que como tol mundu sabe taba pobláu polos cántabros orgenomescos y vadinienses que los sos territorios espardíense n'ún y nel otru casu peles provincies vecines de Cantabria y Llión.

Significativo ye que nel oriente lleonés castru de la Ercina o na mesma llende actual ente Asturies y Cantabria nel castru de Prellezo apaecieren importantes nicios de toma violenta pol exércitu romanu.

¿Quier vusté señor Menéndez Blanco faenos creer que l'exércitu romanu hai 2.000 años tomaría en cuenta unes divisiones provinciales modernes pa enarbolar la espada o la caña d’olivu? ¿Habría de ser tanta casualidá que los episodios de violencia bélica tuvieren delimitados per una llínea fronteriza del sieglu XIX? ¿Nun va ser, y pregunto malintencionadamente, qu'hai otres cuestiones que orbiten alredor d’esti tema?

Pero prosigamos porque los mesmos arqueólogos cántabros -y d'otres provincies, naturalmente- quedaron ablucaos pola complexidá defensiva del Monte Curriechos entá a dia de güei inigualada en nengún otru escenariu hispanu. Según los especialistes militares -General Ramos Oliver-etc . ellí disputóse un escenariu militar y l'exércitu romanu taba sometíu a una fonda presión y molición que lu movió a refortificarse más allá de lo normal. Ye más, dichu escenariu foi reutilizáu en delles ocasiones distintes y probablemente respondiendo a amenaces distintes y por si fora poco atopáronse otros dos campamentos militares más flanqueándolu, el de Llagüezos y el descubiertu l'añu pasáu.

Diz vusté que nun hai episodios de destrucción nos castros asturianos ¿dizlo vusté o manda-ylo dicir? Porque yo recuérdo-y el de Llagú anque dalgunos, y nun digo del so palu, intentaron lo imposible pa soterrar tal evidencia certificada por Berrocal Rangel, Fabiao y más especialistes y intentar con una cantera que ye la vergoña qu'entá los señala, sí, a DALGUNOS, con un deu poderosu , y tovía hai mas, tamién destruyeron nel Picu Medina les evidencies d'un campamentu romanu probablemente rellacionáu col episodiu de Llagú.
Esplíquenos por qué motivu la Campa Torres foi laminada destruyendo dafechu'l castru indíxena pa llevantar cases de nuevu cuñu romanu. Esplíquenos cuántos castros del centru-oriente asturianu siguieron n'activu y sobrevivieron tres la conquista romana.

Reciéntemente A. Fanjul Peraza doctor n'Hestoria y Arqueoloxía defendió na so tesis ante Almagro Gorbea y de forma brillosa l'enorme impactu nel centru-oriente asturianu de la conquista romana. Dellos alborotadores quixeron contradicilu pero l'autoridá -Almagro Gorbea- mandó callar porque les evidencies yeren inapellables.

El señor Camino en referencia al castru de Caravia o los castros de Villaviciosa yá señaló l'abandonu de los mesmos coincidiendo cola campaña de conquista del 29-19 a.C. ¿Pa qué habríen d'abandonalos, pregunto, los sos pacíficos habitantes y nun honrar confiaos a los sos benefactores invasores?

Dalgunos de vustedes lleeríen una noticia recién publicada en LNE en redol a la primer granxa escavada n'Asturies concrétamente en Teberga, una granxa de la Edá del Fierro. L'autor conclúi que l'impactu de la conquista romana foi tan brutal qu'hai una regresión a nivel alimenticiu y de utillaxe estelante y entá mas, qu'hasta l'añu 50 d.C había un clima latente d'inestabilidá y enfrentamientu. Too ello coincide col episodiu históricu documentado de la revuelta ástur nos tiempos de Nerón o la única mención nel mundu romanu a los Symmnachiarii -tropes bárbares al serviciu del Imperiu Romanu- que ¡oh casualidá! faen referencia a los ástures.

Envaloráu públicu, honorable auditoriu nos alloñaos años 90 del pasáu sieglu empezó aquella trapisonda yá denunciada nel so dia pol arqueólogu ya historiador asturianu afincáu en Suiza don Guillermo M. López y intitulada Xixón Proyectu d'Arqueoloxía que yera una burda copia d'un proyectu d'un antiguu alcalde xixonés, el señor Ignacio Bertrand, y que cuntó col refugu récord de 300 catedráticos. Aquel enorme fraude foi definitivamente desarticuláu polos arqueólogos Sergio Ríos y Gª de Castro; aquel enorme peplum xaz soterráu y escoltáu por escándalos como'l de la Campa Torres o'l del empadronamientu illegal d'arqueólogos del palu que toos conocemos.

Güei como ayeri por razones polítiques y por razones de supervivencia aprovechando la precariedá de munchos arqueólogos inténtase colar al pueblu asturianu la farsa d'una gran romanización y de una conquista incruenta y güei como ayeri van fracasar. Tán fracasando, sábenlo y tán nerviosos y a la desesperada.

Habiendo tiempu un bobu fai un cientu.

Retruque y comentarios a la entrevista fecha a Menéndez Blanco (romanarmy.eu)
Retruque y comentarios a la entrevista fecha a Menéndez Blanco (romanarmy.eu)
Contador Estadistiques