María Teresa de Borbón-Parma, una militante comprometida

Javier Cubero's picture

El próximu sábadu 17 d'Abril, a les 17 hores, na parroquia de Santa María de Trubia (conceyu d'Uviéu), diversos ciudadanos asturianos vamos participar nun funeral n'alcordanza de María Teresa de Borbón-Parma.

Hai un añu yá, el xueves 26 de Marzu de 2020, que finó en París, víctima de la pandemia del COVID-19, a los ochenta y seis años d'edá.

María Teresa de Borbón-Parma foi una muyer de gran significación hestórica non solamente pola so aportación militante ya intelectual al Carlismu sinón tamién pol destacáu papel que xugó na oposición antifranquista.

Fía de Don Xabel de Borbón-Parma y de Doña Madalena de Bourbon-Busset, nació'l 28 de Xunetu de 1933 en París. Siendo una neña tovía vivió xunto cola so familia'l drama de la II Guerra Mundial, la ocupación de Francia polos nazis, y la detención del so padre pola Gestapo. Un episodiu tarrecible yá que'l so padre, activamente comprometíu cola Resistencia antifascista, sería internáu nel infiernu de los campos d'esterminiu, primero, en Natzweiler, y más tarde, en Dachau.

Al igual que los sos hermanos Carlos Hugo, María Cecilia y María de les Nieves, foi militante activa del Partíu Carlista a lo llargo del tardofranquismu y la transición. En 1957 acudió per primer vegada a Montejurra, para acompañar y sofitar a Carlos Hugo nel so primer discursu políticu énte la militancia carlista. Darréu, al igual que María Cecilia y María de les Nieves, percorrió'l territoriu español pa contactar y revitalizar los estremaos núcleos territoriales del Partíu Carlista. De manera entemecia con esti llabor de reorganización política, les mocedaes carlistes de la AET y del MOT impulsaben un procesu de renovación ideolóxica col cual los fíos de Don Xabel tamién se comprometieron. Asina, María Teresa en 1968, por mor d'un viaxe per Andalucía, declaraba al diariu Odiel, d’Huelva, que'l conteníu ideolóxico del Carlismu «respuende a la so orientación socialista». Énte'l remocicamientu del Carlismu, la reacción represiva del réxime franquista non solamente afectaría a los militantes de base sinón que s'estendería tamién a María Teresa y la so familia, que seríen obligaos a volver al esiliu a finales d'ese mesmu añu de 1968.

En 1972 María Teresa asumió la dirección de les rellaciones internacionales del Partíu Carlista. A lo llargo de los vinientes años participó en diversos foros europeos al empar que trataba de construyir pontes ente los distintos sectores de la oposición democrática. Mención especial merez la so participación nel Congresu Mundial de les Fuercies de Paz celebráu n'Ochobre de 1973 en Moscú, onde estableció una escelente relación personal con Dolores Ibárruri. Foi convidada entós a pronunciar, xunto con «la Pasionaria», les pallabres de clausura d'un aconceyamientu ente la delegación española asistente al Congresu y un grupu d'antiguos «neños de la guerra». El so mensaxe foi claru y senciellu: «Perdimos la guerra (toos). Vamos ganar la paz (toos)». Non muncho dempués el Partíu Comunista d'España y el Partíu Carlista confluyeron na Xunta Democrática d'España, mientres que paralelamente Santiago Carrilllo aconceyaba en París con Don Xabel. Dos sectores políticos que na Guerra Civil combatieron en trincheres antagóniques van xuntase pa lluchar contra l'enemigu común que representaba la dictadura franquista. Cuando, en Marzu de 1976, la Xunta Democrática d'España y la Plataforma de Converxencia Democrática van fundise pa crear Coordinación Democrática, popularmente conocida como «la Plataxunta», el nuevu organismu foi presentáu nuna rueda de prensa celebrada en París. La vocera qu'anunció entós la unidá de la oposición foi María Teresa: «Dicíase que nun yéramos capaces, les fuercies de la oposición española, de xuninos. Pues tamos xuníos».

Acullá del activismu políticu, la esmolición intelectual de María Teresa motivó que qu'algamase un doctoráu n'estudios hispánicos pola Universidá de La Sorbona (París), y otru en socioloxía política, con una tesis sobro'l conflictu nacional irlandés, pola Universidá Complutense de Madrid, de la cual foi profesora más tarde.

Yera autora de dellos llibros sobro temátiques tan estremaes como la hestoria del carlismu o'l mundu islámicu: El momento actual español, cargado de utopía (1977), La clarificación ideológica del Partido Carlista (1979), Cambios en México (1990), Magreb: nuestro poniente próximo (1994), Don Javier, una vida al servicio de la libertad (1997), Desde Tánger: la transición que viene (1999), La Transición desde el frente exterior (2001) y Así fueron, así son (2009).

Identificada coles corrientes más progresistes y avanzaes de la Ilesia Católica, la so asistencia yera frecuente nos congresos qu'añalmente celebra en Madrid l'Asociación de Teólogos y Teólogues Xuan XXIII.

A lo llargo de los caberos años de la so vida, continuó reivindicando los mesmos ideales que na so mocedá en favor de la emancipación social y nacional de los pueblos, realizando numberosos viaxes pel mundu nos cualos entrevistóse con figures tan relevantes na llucha antiimperialista como Yasir Arafat o Hugo Chávez.

Tamién siguió con especial esmolición el conflictu desendolcáu en Catalunya, criticando la represión exercida pol Gobiernu central al empar que reclamaba la lliberación de los presos políticos catalanes en dalgunes de les sos caberes entevistes en diversos medios de comunicación.

Contador Estadistiques