Guerra

Nel Morán's picture

¡Cuánta cobardía s’escuende nuna guerra! La del que la declara, sabedor qu’él enxamás nun la va sufrir. La del que fae d’ella un negociu, enriqueciéndose cola muerte. La del que la bendiz, convirtiendo la relixón nuna xustificación pa tantu desastre. La del que la vive como una profesión, tornando la retaguardia nel so reinu demientres que’l pueblu llucha y da la so sangre en primer llinia. La del que la xustifica, fanáticu qu’alloquez col mal de los demás…

La guerra ye un sinónimu de cobardía, ye’l llar de los cobardes qu’enllenen les sos arques con medalles d’oru a embute y pallabres de valor que namái coticen en bolsa, ye la droga de los patriotes qu’aporren a los inocentes que los descubren como facistes, ye la mar de cálabres que morrieron pa que los sos señores engordaren l’arguyu, ye esa muyer violada baxo la xustificación de los mandos, ye la fame de los que namái son pueblu…

Nun los duldéis, collacies/os, la guerra ye inxustificable, amuesa a les clares lo peor de los seres humanos y estroza la vida y la natura, el planeta. Enxamás nun creyáis a los que vos falen de les razones pa matar en nome de patries que nun seyan la vuesa casa, el vuesu pueblu, vosotros mesmos. Tenten gañavos pa que’l so negociu de muerte crezca, pa enriquecese más y más demientres vosotros veisvos más y más probes cada día. Sólo la paz ye riqueza pa toos.

La guerra mazcarítase una y otra vez, cambia de nome, de protagonistes, d’inocentes que la sufren, con tal que’l negociu nun decaiga. La prensa necesita de nueva carnaza pa enllenar les páxines, los minutos, y los monederos de los propietarios. Los seres humanos cansamos desiguida de les noticies repetíes muncho, necesitamos de nuevos escenarios pa les sos bombes informatives. Venden muncho les imáxenes de neños muertos, de families buscando solución al so sufrimiento sufriendo más, de fame, de cases y pueblos cayíos piedra a piedra,…, pero necesiten llugares nuevos, que nun aburran, anque los tertulianos seyan los mesmos ignorantes, col mesmu cantar, col mesmu saber de too y nun saber de nada.

Sáḥara, Palestina, Irak, Siria, Yemen, Afganistán, Ucrania…, garren fama un tiempín y depués dexamos que sigan sufriendo en silenciu y buscamos un nuevu oxetivu nel qu’esparder la nuesa solidaridá.

La muerte cotiza en bolsa.

Contador Estadistiques